uMthunywa
Thokozile Mbedzi
ZlLOKHE zinkemile izakhamizi zesiqintini seTindi, esigabeni seMasikiri, eGokwe ngemva kokuba izakhamizi ezinhlanu zihlasele indoda eleminyaka engu-21 ziyethesa icala lokutshontsha ingalukhuni zayibulala.
Kubikwa uTwo-boy Ngwenya oleminyaka engu-60 mhlaka 21 Nhlolanja wananzelela ukuthi ingalukhuni zakhe zazingasekho esilugwini kuthe ngosuku olulandelayo wezwa udletshana lokuthi zitshontshwe nguShadreck Moyo okwenza wabikela ezinye izakhamizi ezine, uJohn Mlotshwa, Benjamin Siamandanda, Garikai Nzungu loNorest Ngwenya balanda uMoyo.
Kubikwa abahlanu laba bafika babopha uMoyo ngengxoza andubana baqale ukumbhaxabula ngezigodo bembuza ukuthi zingaphi ingalukhuni azitshontshileyo.
Ekhuluma lentatheli kaMthunywa ulnspector Emmanuel Mahoko uthe kulamadoda amahlanu ahlasele enye indoda yafa kumbangwa ingalikhuni ezitshontshiweyo. Kubikwa abahlanu laba sebemtshayile bathola ingalukhuni eyodwa andubana bamtshiye.
Mhlaka 23 Nhlolanja isimo sikaMoyo saba sibi wacina esedlula emhlabeni.
Amapholisa abikelwa ngendaba le azochwayisisa kwabotshwa uNgwenya kukanti laba abane lokhu bengakabotshwa.
Isidumbu sahanjiswa emotsha yeGokwe South District Hospital ukuze siyehlolwa imbangela yokufa.
“Amapholisa acela uzulu ongabe elolwazi lwalapho okulabane abathi uJohn Mlotshwa, Benjamin Siamandanda, Garikai Nzungu loNorest Ngwenya ukuthi babikele amapholisa aseduzane labo,” kuphetha uInsp Mahoko.
