uMthunywa
Jeremiah Mlauzi
IBIKHALA ngendlala indoda yeLwendulu eHwange emiswe phambi komthethwandaba weHwange isetheswa umlandu wokubhaxabula umkayo ngoba ithi wayincitsha uluju lwemvelo, iphalamende phela.
UBrian Nkomazana oleminyaka engu-27 kubikwa wacaphuka lapho umkakhe emncitsha uluju lwemvelo andubana ambhaxabule kabuhlungu phezu kwalokhu waphosa wamgwaza ngengqamu okwabangela ukuthi umngane wakhe uKelvin Tshuma (27) azolamula kodwa laye wacina ehola izibhakela waphinda wagwazwa ekhanda.
UNkomazana umiswe phambi kukamantshi uSharon Rosemani esetheswa umlandu wokutshaya.
Umsolwa ulivumile icala lakhe wacela ukuba inkundla imxolele.
“Umkami wala ukunginika uluju lwemvelo okulilungelo lami kungakho-ke ngacaphuka yikho nje ngacina ngimtshaya andubana ngitshaye njalo umnngane wami uTshuma owayezolamula. Ngiyavuma ukuthi ngadala icala leli kodwa ngangithukuthele kungakho-ke ngicela uxolo,” ngumsolwa lo.
Umtshutshisi kulelicala uMnumzana Onias Nyathi ubikele inkundla ukuba mhlaka 31 kuMpalakazi nyakenye, umamangala uTshuma wavakatshela umsolwa emzini wakhe wamfica ehlezi umkakhe amadundulu.
Uthe enanzelela ukuthi umsolwa angagwaza umkakhe ngengqamu ayeyithwele wazama ukulamula kodwa umsolwa wahle wamhlanekela wamtshaya ngesibhakela kanye emlonyeni andubana amgwaze ngengqamu ekhanda.
UTshuma walimala kakhulu ekhanda lasemlonyeni.
Umamangala wasiwa esibhedlela andubana umsolwa abotshwe.
Umantshi uthe umsolwa kaqale ayehlolisiswa ukuba uhlezi njani labanye abantu emphakathini engakamuphi isigwebo sakhe.
