uMthunywa
Ethel Ncube
KULOTSHEKETSHA weZvishavane otshiye umphakathi ungelamathe ngemva kokuba ethe amakhosikazi akhe amabili agidise izihlalo phambi komphakathi ala wawasukela wawatshaya.
Indaba le yenzakale emavikini asanda kudlula lapho uSamson Gondwe acine etshaya amakhosikazi akhe ngoba eyale ukugida emphakathini.
UGondwe umiswe emthethwandaba weZvishavane phambi kukamantshi uEvia Mature esetheswa icala lokuhlukumeza amakhosikazi akhe.
Kubikwa ukuba umsolwa wayenatha ndawonye lamakhosikazi akhe amabili ngesikhathi besanatha wathi kawasukume agidise izihlalo zawo phambi komphakathi ala ukwenza lokhu wasukuma wawatshaya ngamatshe enyaweni lekhanda.
Umsolwa uncitshwe ibheyili ngumantshi ngoba kusesatshwa ukuba uzaphazamisa ukuchwayisisa njengoba ehlala lamakhosikazi akhe.
UGondwe uzabe esejele elinde isigwebo sakhe sokuhlukumeza.
Umtshutshisi kulelicala bekunguMnumzana Isheunesu Mashayanye.