uMthunywa
Ethel Ncube loThando Dube
ZISELE zikhakhamele izakhamizi zeHope Fountain, koBulawayo ngemva kokuba elinye inina kuleyondawo libelethe umuntu-nyamazana.
Kubikwa uNkosazana Zanele Sibanda wakulesosigaba ngenyanga kaNhlangula wabelethela umntwana owayengumuntu ngaphansi kodwa elobuso bendwangu.
UMthunywa ukhulumisane loMable Sibanda ongudadewabo kaZanele othe kuliqiniso ukuthi uZanele wabeletha umntwana olobuso bendwangu.
“UZanele wazala umntwana oyinkazana kodwa owayelobuso obungakhanyi kuhle ngoba babukhangeleka njengobendwangu kumbe sithi inkawu kungaqedakali kuhle ukuthi kungabe kungumuntu bani? Umntwana wakhona watshona esanda kubelethwa,” kutsho uNkosazana Sibanda.
Ekhuluma loMthunywa umfakazi okhethe ukungabethwa ngegama ulandise ukuthi kwamangalisa imuli ukuzalwa komntwana olobuso benyamazana.
“Kwamangalisa imuli lezakhamuzi ukuthi umama lo azale umntwana olobuso bendwangu. Wabelethela endlini njalo ngesikhathi ebeletha kubikwa imbeleko ayiphumanga okwabangela ukuthi aze avakatshele esibhedlela ukuthi ayekhitshwa.
Uphinde wathi osiyazi bathi uloywe ngesinye isalukazi.
“UZanele wavakatshela osiyazi ngodaba lolu bamtshela ukuthi ngesikhathi ezithwele kulogogo owayemvakatshela ebusuku afike athathe umntwana ahambe laye amphendukise ngemva kwesikhathi okwabangela ukuthi umntwana lo acine elobuso bendwangu,” kuchaza umfakazi lo.
UMthunywa uphinde wakhulumisana loMnumzana Mhlaba ongumkaZanele njalo onguyise walumntwana oveze ukuba kalalwazi ngalokho
“Mina ngingakhuluma amanga ngoba ubaba nxa umama ebeletha kavunyelwa ukungena endlini yakhona angizange ngimbone umntwana. Ngezwa kuphela sekukhulunywa ukuba ubengani yinyamazana nxa ukhangele ubuso bakhona,” kuphetha uMnu Mhlaba
