uMthunywa
Cornelius Luphahla
KULENDODA ehlala esigabeni seDekha eLake Alice eLupane ebanjwe xhaka ngamapholisa ilamabhakede amabili embanje isanda kuwavuna esivandeni sayo, uMthunywa uyakuveza lokhu.
Umetheswacala uMeki Bhundu Ndlovu oleminyaka yokuzalwa engu-32 ohlala esigabeni esingaphansi kukasobhuku uMlungisi Ngwenya ubotshwe kumaviki amabili adluleyo ngemva kokutholakala elamabhakede amabili embanje.
Intatheli ixhumane loMnumzana Limukani Sithole oyisakhamuzi sakule indawo wachaza ukuthi uNdlovu ubeseleminyaka eminengi ethengisa imbanje kulesisigaba.
“UNdlovu ubesehluphile ngokuthengisa imbanje lapha njalo ubesethengisela labantwana besikolo seMthuphani Secondary okuyinto embi kakhulu.
“Into ebisimangalisa kakhulu yikuthi amapholisa ebengambophi kodwa esazi ukuthi uyazilima njalo ezithengisa imbanje,” kutsho uMnu Sithole.
Kuzwakale ukuthi uNdlovu wathi evela senga ekuseni wabona amapholisa sethutshile emzini wakhe afika acela ukuhlola wawavumela.
Ngemva kwalokho bathola amabhakede amabili embanje efakwe emasakeni amabili okuyikho okwahle kwenza wabotshwa.
Esinye isakhamuzi sakule indawo uMnumzana Mpikelelo Nyathi ubikele intatheli ukuthi ukubotshwa kukaNdlovu kuzaletha ukuthula esigabeni.
“Ukubotshwa kukaNdlovu kuzaletha ukuthula esigabeni ngoba besokulokuganga okukhulu njengoba abantu bebehlala bedakwe zimbanje.
Noma nje ebotshiwe kodwa bakhona abanye abaseleyo abazilimayo njalo abazithengisayo imbanje lezi.
Ngakho-ke labo kufanele babotshwe,” kuchaza uMnu Nyathi.
Ebuzwa ngale indaba usobhuku wakule indawo uMnumzana Mlungisi Ngwenya uvumile ukuthi indaba le uyayazi.
“Kuliqiniso sibili ukuba kulesakhamuzi sakhonapha esibotshwe ngamapholisa silembanje sahanjiswa eLupane emapholiseni. Siyawabonga amapholisa ngomsebenzi awenzileyo.
Okunye njalo amapholisa kufanele ahambe ehlola ezivandeni zezakhamizi ngoba yikho lapho abanye abazilima khona,” kutsho uMnu Ngwenya.
Imizamo yokukhulumisana lesikhulumeli samapholisa esabelweni seMatabeleland North uInspector Siphiwe Makonese yehlule ngoba ucingo lwakhe lwalile ukungena.
