uMthunywa
Ethel Ncube
KULENDODA yakuWadi 6 eMatobo okubikwa idlwengule umntanayo oleminyaka engu-13 andubana imvalele endlini okwamalanga ayisikhombisa ngenhloso yokuthi icala leli lingaphumeli egcekeni.
Umetheswacala esingeke saqamba ibizo lakhe ngenhloso yokuvikela umamangala, uleminyaka engu-31 kubikwa unguyise omncane kamamangala, ofunda ugwalo lwesikhombisa.
Isakhamuzi esibikele intatheli uMnumzana Menyezwa Dube uthe isenzo sendoda le simangalise izakhamizi.
“Undoda lo kukhanya watshiywa lomntwana lo abazali bakhe besiya kwenye indawo, yikho lapho asala khona emenza isihluku lesi. Kukhanya wamhlukuluza okwamahlandla amabili.
“Kulesinye isakhamuzi esacina sibuza ukuthi umntwana lo ungaphi engabonakali, kwadingisiswa wabonakala engakibo. Bathe besiyakhuluma laye bananzelela ukuthi uhlulukiziwe bambuza wasechaza ukuthi uhlukuluzwe nguyise omncane,” kutsho uMnu Dube.
Intatheli ikhulumisane lomunye okuhlanganiso yeMatobo Youth Development Initiative ethuthukisa abesifazane labatsha, uMnumzana Descent Sibanda oveze ukuba udaba lokuhlukunyezwa komfundi oku-Grade 7 balutholile.
“Samukele udaba lwentombazana ehlukuluzwe nguyise omncane saludlulisela emapholiseni njalo umetheswacala usesezandleni zamapholisa,” kubika uMnu Sibanda.
Imizamo yokukhulumisana lesikhulumi samapholisa eMatabeleland South uInspector Loveness Mangena yehlule njengoba ucingo belukhala lungadojwa kwaze kwafika isikhathi sokudindwa kwephephandaba.
