uMthunywa
Cornelius Luphahla
KULENDODA yeZhilo esigabeni seMawabeni eMzingwane District etshiye izakhamizi zithithibele kulandela ukuhlahlela umkayo ekhanda kabili ngehloka ngemva kokumthola encinda uluju lwemvelo letshamali yakhe engumakhelwane.
Isehlakalo lesi senzakale kuviki ephelileyo lapho umetheswacala uWitness Mlilo athole khona umkakhe uSimilo Mlilo esotha umlilo wemvelo loThabani Ndlovu okubangele ukuthi agamule umkakhe kabili ekhanda itshamali yakhe yabaleka.
Kubikwa umetheswacala uthethe isithembo.
Kuzwakale ukuthi uNkszn Mlilo ubesehlanyisana loMnu Ndlovu sebebonakala bebonke noma kusemini okudale ukuthi izakhamizi zibikele uMoyo ngalindaba.
UMnumzana Lyton Nkomo ongumakhelwane kaMnu Moyo uthe yena wezwa ngomsindo ebusuku wagijima wathola uMoyo segamule umkakhe.
“Mina ngasengilele ntambama ngezwa umsindo komakhelwane ngagijima ngathola uMoyo segamule umkakhe ethi umthole elele letshamali evela etshwaleni. Ngathi ngibuza ukuthi uNdlovu lowo abanjwe laye ungaphi bathi uhle wabaleka.
“Ngalesosikhathi sahle sathwalela uMaMlilo esibhedlela seSigodini lakho abafika bamdlulisea esibhedlela seUnited Bulawayo Hospitals umkakhe yena usezandleni zamapholisa,” kutsho uMnu Nkomo. UNkosazana Silethemba Ncube oyisihlobo sikaNkszn Mlilo ubikele intatheli ukuthi okwenze uMaMlilo wabanjwa letshamali yikuthi umkakhe ubengasamnaki njengoba ethethe isithembo.
“Mina ngokubona kwami okwenza uMaMlilo waba letshamali yikuthi umkakhe uthethe isithembo ngakho ubengasamnaki. Ngitsho ngoba mina wake wangibikela ukuthi umkakhe kasamnaki sethatha unyanewabo omncane.
Aphambanise ngakho yikuthi alethe itshamali emzini wakhe kulokuthi atshiye umendo ayekwenda kwezinye indawo,” kuchaza uNkszn Ncube.
Isikhulumi samapholisa esabelweni seMatabeleland South uInspector Philisani Ndebele ebuzwa ngale indaba uthe indaba enjalo isisemthethwandaba.
“Indaba enjalo kayisekho ezandleni zethu sisezandleni zemthethwandaba,” kuphetha uInsp Ndebele.
