uMthunywa
YiNtatheli kaMthunywa
NGENXA yokwanda kwengozi zemigwaqo kuqakathekile ukuthi abatshayeli batshayele ngobuqotho ukuze bazivikele ezingozini zemigwaqo.
Angithi nje ikhefu lokuthakazelelwa kwamaqhawe selifikile ngakho inengi lizabe lisiya endaweni ezehlukeneyo ukuyathakazelela insuku lezi, khona okuyikho okuvame ukwenzakala khona izingozi njengoba izimota zizabe zizinengi emgwaqweni.
Kubatshayeli kuqakathekile kakhulu ukuthi behambe ngesineke njalo bengajahi ngoba ukugijima kayisikho kufika.
Phela inengi labatshayeli ikakhulu abatsha yibo asebeqede abantu emigwaqweni nanko phela bahlala bejahile okudala ukuthi bagijime kakhulu.
Okunye njalo okudala izingozi lezi emgwaqweni yikuthi abanye abatshayeli batshayela bengelamacence okuyingozi kakhulu ngoba phela bayabe bengelalwazi olujulileyo ngokutshayela imota.
Osokudale ingozi ezinengi kulezinsuku yikuthi abanye abatshayeli batshayela bedakiwe abanye njalo ngabahamba benatha utshwala emoteni. Lokhu-ke kuyingozi enkulu kakhulu ngoba kusuka kube nzima ukuthi umtshayeli abone kuhle umgwaqo njalo lemithetho yawo uyabe engasayilandeli ngendlela eqondileyo.Ngalokhu kuqakatheke kakhulu ukuthi abatshayeli belandele imithetho yemigwaqo ngoba yibo abathwele impilo zabantu.
Kusenjalo okunye okudala izingozi emgwaqweni yikuhamba ebusuku ngoba phela kulabanye abatshayeli abangalandeliyo imithetho yemigwaqo ikakhulu nxa sokusebusuku bethembe ukuthi kababonwa muntu. Abatshayeli abanjalo bavame ukugijima kakhulu kanye lokuphandla abanye ngezibane zemota zabo ngesikhathi bephambana okungadala ukuthi umtshayeli ophandliweyo engasawuboni umgwaqo kwenzeke ingozi.
Kuqakathekile njalo ukuthi abatshayeli beqale behlole izimota zabo ukuthi ziphilile na ngesikhathi bengakasuki besiya lapho abaya khona. Ngitsho ngoba abanye abatshayeli basuka badelele bahambe ngemota ezingaphilanga kuhle imota yakhona uzwe kuthiwa iphume ivili kwaphela abantu kumbe itshile.
Ngalokhu batshayeli hambani kahle libuye liphathe kuhle abantu elibathwalayo.
