uMthunywa
Cornelius Luphahla
ZISELE zinkemile izakhamizi zelokitshini leThorngroove koBulawayo ngemva kokuba kuthutshe inkalakatha yexoxo elilamazinyo livela esifuleni esiseduzane andubana lihlaselwe ngamadoda engazi ukuthi sezithezele olulenkume.
Isiga lesi senzakale kuyonale iviki ephelileyo lapho uEarnest Dube labanye abangane bakhe okungasatholakalanga amagama abo abatshaye khona ixoxo leli eduzane lesifula uMazayi bucwadlana lesibhedlela seThorngroove andubana baphume umungula.
UMthunywa ukhulumisane lesinye isakhamuzi sakule indawo esithande ukubizwa ngokuthi nguNdlovu njalo esasikhona kusenzakala lesisiga sachaza ukuthi ixoxo leli lalilikhulu kakhulu.
“Ixoxo leli lalilikhulu okwedlula ufudu njalo babethi nxa belitshaya lihwabhe njengenyoka. Isimanga yikuthi lalithi nxa likhamisa kuvele amazinyo amakhulu,” kutsho uMnu Ndlovu.
Uqhubekele phambili wathi lokhu wathwetshulwa yingwe kakaze abone ixoxo elilamazinyo njalo elikhulu njengalelo.
Kuzwakale ukuthi ngemva kokubulala ixoxo leli baliphosele esifuleni lesi kwabonakala uMnu Dube lomunye umngane wakhe sebephuma umungula.
UMthunywa ukhulumisane njalo loNkosazana Sithabile Moyo wachaza ukuthi uMnu Dube lomngane wakhe lo baphuma umungula okwesikhathi eside baze basiwa kubaphurofethi.
“UEarnest lomngane wakhe bathi beqeda ukubulala ixoxo leli, sezwa kuthiwa sebephuma umungula kodwa abanye babo abazange bagula.
“Ngikhuluma nje uEarnest kuthiwa lokhu egula kungakho abangakibo bamuswa enyangeni, umngane wakhe nguye engingezwanga ukuthi waphetha ngani,” kuphetha uNkszn Moyo.
