uMthunywa
Tadiwa Nyatanga-Pfupa
INHLANGANISO yeNational Aids Council (Nac) njengenjayelo izaphatheka kumbukiso wamatshumi ayisithupha weZimbabwe International Trade Fair (ZITF) ngaphansi kwendikimba ethi: Propagating Industrial Growth through Trade and Investment.
Ilizwe leZimbabwe njengawonke amazwe isiphatheke kunhlelo eziphuthumayo ezihlose ukuqeda umkhuhlane weAids kusiyafika umnyaka ka 2030.
Inhlanganiso yeNac izasebenzisa ithuba leli ukuze itshengise ukuthi njengelizwe sisendleleni yokuqeda isifo sengculazi kusiyafika umnyaka ka2030.
Inhlanganiso izabukisa ukuthi yenzani ngomqedazwe lo. Umbukiso lo uza ngesikhathi lapho inhlanganiso yeNac ihambisana lendikimba yeWorld Aids Campaign yomnyaka ka2018 kusiya ku-2019 ethi: Banakwazi isimo sakho.
Indikimba le isiqhelisiwe ukuze kukhuthazwe abantu ukuthi bazi izimo zabo mayelana leHIV kanye lokuthi bahlolelwe isifo seTB, umkhuhlane wetshukela, imikhuhlane ethelelwana emacansini, imvukuzane kanye lezinye izifo.
Abantu bazangena kumbukiso weZITF belenjongo ezehlukeneyo. Abanye bazabe bezobukisa, abanye bayabe bezobona okubukiswayo kumbe bezothenga okubukiswayo ngalesosikhathi.
Yiloba yiphi injongo abantu abayilanda eZITF, abantu kumele badinge isikhathi sokuthola ulwazi oluzabanceda kumpilakahle yabo. Isitanda senhlanganiso yeNac kumele sivakatshelwe nomakanjani ngumuntu wonke ozabe eseZITF.
Lalabo akade bengahlelanga ukuba bafike eZITF kumele bahlele ukuyakhona ngoba abeNAC bazabe bekubiksa khona.
I-Nac isiqoqe ulwazi ezalwabela abantu bonke kungakhathalekile ukuthi uleminyaka yokuzalwa emingaki, umhlobo, isithunzi sakho emphakathini kanye lokholo.
Ulwazi oluzanikwa abantu luyabe luphathelane lokuvikela kanye lokuphila legcikwane le-HIV, ukuvikelwa kokuthelelwa kosane igcikwane ngunina, ukuvikela ukuthelelwana kwesiki, ukuzivikela kumvukuzane, kusifo seTB, imikhuhlane engathelelwanayo, imikhuhlane ethelelwana emacansini kanye leminye imikhuhlane.
Ulwazi ngokudla kanye lokuphila kuhle kwalabo abaphila legcikwane leHIV kanye le Aids kuzabe kukhona esitandeni seNac.
Intsha (eleminyaka ephakathi kwengu-10 kusiya ku-24) yibo abakhangelwa kakhulu njengoba besengozini enkulu yokuthelelwa igcikwane le HIV ukwedlula abadala.
Inhlanganiso yeNac ibabona beqakathekile kakhulu njalo izaba lesikhathi esiyabe sifakelwe abantu abasakhulayo. Kuzabe kulokuxoxisana kwabatsha, ukubukiswa kwamavidiyo, ingxoxo kanye lolwazi olubhalwe phansi abazahamba lalo ezindlini.
Kungaba kuhle ukuthi bonke abatsha bavakatshele isitanda seNAC ukuze bathole ulwazi ulongabasiza empilweni zabo.
Omama abasabancane lamankazana bazakufundiswa ngobubi bokuthengisa umzimba lendlela abangena ngazo emacansini eziphephileyo ngesikhathi esifaneleyo. Labantwana abancane besikolo kumele bavakatshele abeNAC ukuze bazothola ulwazi.
Kuzabe kuhlolwa igcikwane leHIV njalo kucetshiswa kuphindwe kuhlolwe lesifo seTB. Izimuli kanye labantu abazimele bodwa bacetshiswa ukuza bezothola ulwazi oluzaphathisa kumpilo enhle njalo ende.
Labo abaphila legcikwane leHIV bazabakwazi ukuthi baphile njani lalabo abangelalo bazathola ulwazi ukuthi balondoloze njani isimo sabo.
“Sesiwulungiselele lumbukiso njalo siyazi ukuthi silolwazi lomuntu wonke. Impendulo zabantu esibaphathisayo emawofisini eNAC esigabeni kanye lesabelweni lakuncingo zokuxhumana zenhlanganiso kanye leminye imibono esiyithola kumbukiso esiphatheka kiyo kudlale indima enkulu kumalungiselelo alonyaka,” kuchaza uNkkz Nyathi.
UNkkz Nyathi uyengeze esithi ukuthola umvuzo njengeminye iminyaka kungabe kukuhle, kodwa injongo yenhlanganiso yokuphatheka kumbukiso lo yikwabela abantu ulwazi oluzabaphathisa empilweni yabo.
Isitendi seNAC stand siku CIH Pavillion, Inkonkoni Drive kanye loThomas Meikles Boulevard emagumeni eZITF.
