uMthunywa
Nkosilathi Sibanda
AMAQEMBU omdlalo webhola lenyawo akumaligi aphezulu kuleli asenxuswe ukuthi akhangelisise ithalenta kundawo ezisemaphandleni nanko phela kuyavela ukuthi banengi abasakhulayo abafisa ukuveza ithalenta labo.
Inkuthazo le yethulwe ngusomabhizimusi ohlala eSouth Africa uKhumbulani Moyo ngesikhathi ekhuluma lentatheli yeZimpapers Sports Hub mayelana lenhlelo zakhe zokuthuthukisa ezemidlalo esigabeni seBubi, esabelweni seMatabeleland North.
UMoyo, esebenza lomfowabo uMphilisi, badume ngokusekela inhlelo ezinengi eziphathelane lokuphakamisa ithalenta lentsha kulindawo. Amadoda womabili la asanda kuqhuba umncintiswano walonyaka oweRoyal Cup oqhutshelwe eBadala Business Centre, eNyathi.
UKhumbulani ngusomabhizimusi ongumqondisi weRoyal People Investments, kuthi uMphilisi laye ngusomabhizimusi ogxile kwezokulayitsha impahla.
Basekela inkezo yeRoyal Cup ngemali engangeR50 000 kunguqu lasemdlalweni wokuqaga.
Inkezo yeRoyal Cup le yiyo njalo eyafukula ingcitshi kanobhutshuzwayo uPrince Dube owadlalela iqembu leHighlanders, andubana akhethwe kuqembu lamaWarriors.
UDube, odume ngelithi “Mgadafi” usedlalela iqembu le-Azam eTanzania.
UKhumbulani uthe kungumlandu wabaqeqetshi labacuphi bethalenta kumaqembu amakhulu ukuthi bavakatshele emaphandleni bazibonele ukudla kwamehlo.
Uthe kuzaphuma omunye onjengoPrince Dube kulindawo.
“Sizafukula omunye uPrince Dube ngoba ligcwele ithalenta kwelakithi. Ngokuxhasa imidlalo yenguqu le, leminye eyokuqaga, sihlose ukuthi sikhuthaze intsha elethalenta lemidlalo. Angeke senelise ukukhuthaza abantwabethu nxa kungela baqeqetshi abavela kuPremier League kumbe kwamanye amaligi aphezulu kwelakithi.
“Sinxusa wonke amaqembu sisithi wozani ngobunengi lizozibonela. Indawo yakithi esigabeni seBubi siphethe okunengi okubalisa lethalenta lezemidlalo,” kutsho uKhumbulani.
Uthe yena lomfowabo bazaqhubeka besekela imidlalo bekhangelele ukuthi kuminyaka ezayo kube labadlali asebeguqule impilo zabo kwelingcono.
“Inkezo yeRoyal Cup isasekhona ngoba sizimisele ukuthi siqhubeke sisekela ngesilakho. Lo ngumsebenzi womphakathi ngoba konke esikwenzayo sikwenzela umuntu wonke ohlala kulindawo yakithi.
“Ngakho-ke, sibeka isicelo emphakathini ukuthi ubambisane lathi, sakhe isizwe sakithi ngokukhulisa abantwana abalethalenta lemidlalo. Singenza njalo, sizabona intuthuko kancane kancane,” nguMoyo lo.
Kusenjalo, inkezo yeRoyal Cup yalonyaka yathwalwa liqembu leBubi Football Club ngemva kokunqoba iBest FC 1-0. Ibhola lahlohlwa nguZibusiso Moyo, umdlalo ususiya phela.
Zombili zadlala kuhle ukuthi zifinyelele isigaba sokucina somqhudelwano. Iqembu leBubi ladlula ligijima phezulu kweqembu leMahlabathini. Intshantshu zona zahwitha zisedlula iqembu leBlack Swallows kuhlandla lama semi-final.
Iqembu leBubi laphiwa umvuzo we-US$150, inkezo i-kit, amabhola lemendulo.
Lamanye amaqembu aphatheka emncintiswaneni athola imvuzo. Abadlali abenza kuhle labo babongwa ngemali.
Isikhulumi salumqhudelwano u-Admos Ncube ubikele intatheli ukuthi babonga abalandeli bamaqembu lababukeli ngokuziphatha kwabo.
“Konke kwaqhuba kakuhle njalo sitshayela ihlombe abalandeli bomdlalo wenguqu lapha koBadala ngokuzibutha. Lonyaka akuzange kube lomsindo kumbe ukuxokozela. Siyabonga ngokuziphatha kwabo,” kutsho uNcube.
