uMthunywa
YiNtatheli kaMthunywa
IQEMBU lesizwe kumdlalo wokugijima eliphatheka kumincintiswano yama-African Games lizabuya lemendulo ezinengi, kutsho umqeqetshi walo uPhakamile Lisimati.
Iqula labagijimi leli liphakathi kokulwisana lamanye amazwe ase-Africa kulumkhosi wemidlalo etshiyeneyo oqhutshelwa edolobheni leRabat kwele-Morocco.
ULisimati ubike ukuba iqembu lakhe lilolonge ngendlela ebatshiye bekholwa ukuthi bazaphenduka ekhaya belezicoco ezingcono kulalezo abazithola kumincintiswano odluleyo. IZimbabwe ithumele abagijimi abalitshumi lanhlanu kulumncintiswano oqale ngoMvulo usiyaphela mhlaka 30 kulinyanga.
Kubagijimi abakhona, ithemba lesizwe likubagijimi ababalisa uFaith Dube loDickson Kapandura asebetshengise ukuba bangayilwela imendulo yegolide.
ULisimati uthe kuyathembisa.
“Silapha eMorocco silande ukuzoncintisela ukunqoba imendulo, ikakhulu ukuthola igolide.
“Iqembu lilolongile okuzwayo kumalanga adluleyo. Silolonge kakhulu kubuciko bokugijima, ukubamba isikhathi lokusebenzisa isiqubu.
Okungijabulisayo yikuthi bonke baqinile,” kutsho uLisimati.
Umqeqetshi lo uthe uzakhangelela impumela enhle kuqula lakhe labagijimi be-relay ye 4x100m eselizakhele udumo ngokwenza kuhle kumincintiswano yezwekazi elisezansi yeAfrica.
Abanye abagijimi abalakho ukuphakamisa ifulegi yesizwe nguDickson Kamurengu lomgijimi we200m uKundai Maguranyanga ololonga eseMelika.
ULisimati uthe okwenza bakholwe ukuthi bazaphuma lezicoco yikuthi kulamalunga eqembu lakhe alolongela enkundleni yengcitshi yeHigh Performance Centre ePretoria, Melika, eBelgium.
