uMthunywa
YiNtatheli kaMthunywa
Kulemuli ehlala eWaterfalls, eHarare okubikwa seyadela umuzi wayo ngenxa yezinto abangaziboniyo okubikwa nxa ziqansile ziyabahlubula impahla abazigqokileyo, ziphoselwe kude basale beze.
Sengathi ukuhlubulwa impahla kuncinyane, imuli le ilomntwana oyintombazana okubikwa uphuma impethu emzimbeni.
UNkosikazi Zvanyadza Masvosva Mutsau (43) kunye lomkakhe uMnumzana Albert Mutsau (47) lemuli yabo sebehlala endaweni ezehlukeneyo ngohlupho lolu.
UNkkz Mutsau usehlala eEpworth labantwana kukanti umkakhe kakwaziwa ukuthi usehlala ngaphi.
“Uhlupho lwethu lwaqala ekhaya eGuruve, sihlutshulwa zonke izigqoko esizigqokileyo yizinto esingaziboniyo. Lokhu kwenzakala ubaba engekho.
“Besithathelwa imali lokutshaywa yizinto lezi. Sabuya eHarare endlini yethu eWaterfalls, kwaqala ukusihlupha ngamandla.
“Olunye uhlupho ngolokuthi umntanethu oyinkazana waqala ukuphuma impethu njalo asikwazi ukuthi kubangelwa yini,” utshonjalo umama lo.
Uthe wacina egcina impethu eziphuma kundodakazi yakhe wazifaka ku-wadirobhu ephepheni efuna ukuhamba lazo kumphurofethi kodwa umkakhe wazikhipha.
“Savumelana lobaba ukuthi siyedinga usizo kubaphurofethi loba kubosiyazi lempethu lezi ukuze sithole usizo lomntanethu. Kodwa phakathi kobusuku ngama 3 ubaba wavuka ngicabanga ukuthi mhlawumbe uyazikhulula kodwa wahle wahamba kokuphela kuze kufika lamhlanje,” kutsho uNkkz Mutsau.
uMnumzana Albert Mutsau
Uthe ukuthathelwa imali lokukhitshwa impahla sekusenzakala ngamandla okuyikho okwenza babaleka endlini yabo eWaterfalls bazohlala eEpworth lapho abaloja khona indlu eyodwa labantwabakhe abahlanu.
“Safulathela ngekhaya ngenxa yohlupho lolu. Sasesizibona sesinqunu sihlezi endlini, sasisembulwa ingubo silele embhedeni, imali icatsha siyibekile. Ubaba angazi ukuthi wanyamalala wayangaphi, sizwa ukuthi use Warren Park.”
Uthe kuhlupho lomntwana lokuphuma impethu bake baya esibhedlela banikwa amaphilisi lemithi kodwa akuzange kutshintshe.
Khathesi kasilampahla zokugqoka ngoba ezinye ziyathathwa kuwadirobhu konke lengubo, lemali iyanyamalala. Abantwana kabasafundi, ngapha uyise wabaleka,” utshonjalo.
Uthe udinga usizo kuhlupho lolu.
Intatheli zidinge uMnu Mutsau lapho abesakha khona.
Uthe unkosikazi wakhe ulitsotsi. Uthe akulalutho olutshontsha impahla zabo kunye lemali yabo.
“Mina kangilabo ubufakazi bendaba lezi ukuthi impahla lemali zithathwa yizinto ezingabonakaliyo. Kwaqala ekhaya sabuya lapha eHarare. Unkosikazi nguye okhuluma indaba le, mina kangikaze ngikubone.
“Kwake kwacatsha i$15 000 kwathiwa ithethwe ngamasalamusi, izamende, ama-door frames kwakucatsha endlini, kunengi okwenzakalayo,” kutsho uMnu mutsau.
Uthe indaba yokuthi umntwana uphuma impethu uqale ukuyizwa ngentatheli.
“Sengikhathele ngendaba ezingapheliyo. Umntwana lo kuthiwa ulesali okumele likhitshwe,” utshonjalo.
