uMthunywa
Cornelius Luphahla
ABAFUNDI beKariyangwe eBinga baphakathi kwetshe lembokodo ngenxa kokuswelakala kwesikolo seSecondary kule indawo osekubangela ukuthi abafundi bakule indawo bahambe umango ongamakhilomitha angu-15 besiya esikolo.
Abantwana bezigabeni ezigoqela iTobwe, Mabombo kanye leNekapande yibo abahamba umango omude lo besiya esikolo seKariyangwe Secondary School. Yikho nje izakhamizi lezi sezinqume ukuthi zakhe isikolo eTobwe.
UMthunywa uvakatshele kule indawo ngempelaviki, wakhulumisana lesinye isakhamuzi sakule indawo, uMnumzana Barnabas Munkuli wachaza ukuthi inengi labantwana liyekela isikolo ngenxa yomango omude.
“Inengi labantwana abahlala khatshana bayekela isikolo ngenxa yokwesaba ukuhamba umango omude. Amantombazana wona acina esenda eleminyaka engaphansi kwengu-16 ngoba bengasafuni ukuya esikolo ngokwesaba umango.
“Kukanti abangabafana bona bacina becatsha egangeni ngoba besehlulwa ngumango,” kutsho uMnu Munkuli.
Esinye njalo isakhamuzi sakule indawo uMnumzana Doli Nyoni ubikele intatheli ukuthi ekuhambeni kwabantwana besiya esikolo bahlangana lengozi ezitshiyeneyo.
“Abantwabethu nxa besiya esikolo bahlangana lengozi ezinengi ezehlukeneyo ezingaphazamisa impilo zabo.
Ngikhuluma nje kumnyaka ophelileyo kulabantwana ababili abe Nekapande ababanjwa iganyavu besendleleni besiya esikolo. Umnyama nje yikuthi abenza lokhu abazange babanjwe, ngakho ubude bomango lo buyingozi kakhulu.
“Egangeni elifanayo kulenyamazana eziyingozi ezilakho ukuthi zihlasele abafundi laba bevela esikolo njengoba kuyabe sokusebusuku,” kutsho uNkszn Nyoni.
Omunye umbalisi ofundisa esikolo seKariyangwe ongathandanga ukuqanjwa ngegama ubikele intatheli ukuthi inengi labantwana besikolo ikakhulu elihlala khatshana liyazithwala lisafunda.
“Abafundi abanengi abangamankazana ikakhulu abahlala khatshana bayazithwala besesebancane. Ngikhuluma nje lonyaka kuthemu yokuqala kube labantwana abangu-15 abazithwalayo njalo inengi labo beloniwe ngabantu abadala njalo ngabahlala khatshana.
Ngakho ukuswelakala kwesikolo eduzane kuyingozi enkulu ebantwaneni.
Induna yakule indawo uSiansali uveze ukuthi abafundi bakule indawo ikakhulu abahlala khatshana abaphumeleli kuhle ezifundweni zabo.
“Abantwana bakule indawo ikakhulu abafunda behlala khatshana abaphumeleli ezifundweni ngoba bafika esikolo sebediniwe okwenza ukuthi behluleke ukubala. Lokhu kwenza njalo ukuthi umntwana azonde isikolo ngakho yikho sibona kungcono ukuthi sakhe isikolo eTobwe.
“Isifiso yikuthi uhulumende lenhlanganiso ezizimele zodwa bangenele basincedise ekwakheni isikolo kule indawo,” kuphetha induna uSiansali.
