uMthunywa
YiNtatheli kaMthunywa
INDABA yobuthakathi isibangele ukungezwani phakathi kwamalunga enye imuli yeMutare kulandela ukusolwa kukababa womuzi ngokuthi ulenyoka esibangela indubo ezitshiyeneyo phakathi kwamalunga emuli.
Abantwana abazalwa kulimuli bathi sebephila ngokuhlala begcoba isawudo ezigqokweni zabo zangaphansi njengendlela yokuxotsha inyoka lezi abathi zibenza abafazi phakathi kobusuku.
Amantombazane la ayisithupha azalwa kumuli yako Tsoriyo yeMutare avele sobala ngokwenzakalayo bethi sebephelelwe ngamacebo kubangelwa ngondofa bakayise labo abathi benza santando kibo ma kusiza ubusuku.
Amadodakazi la ngeSonto enze into yamehlo nanko phela asukume athwala izingungu ayahlabela phambi komuzi kayise ethi asekhathele ngokwenziwa izichaka kwezocansi ngondofa bakayise.
Ngemva kokuba sebeke baya ebantwini amantombazana la athi asebona kusiba ngcono.
Amadodakazi la athi — uMary (44), Shylet (40), Muchanyara (35) loTakura Tsoriyo (30) labanye ababili abangathandanga ukwaziwa ngamagama — bahamba emzini wabazali babo befuna ukuyakhuluma loyise, uRaymond Tsoriyo lonina, uTsitsi Tsoriyo.
Abazali babo kubikwa balile ukuphuma endlini bazikhiyela endlini.
Amadodakazi la athi ondofa laba bathi ondofa laba banceda uyise acebe njalo sokuleminyaka engu-44 elabo. Bathi kuminyaka engu-44 le imuli ibihlangana lokuhlupheka okutshiyeneyo kugoqela ukuhlukunyezwa kwamadodakazi emacansini.
Inotho yemuli yako Tsoriyo igoqela izindlu eziseFern Valley, Hospital Hill, izitolo ezimbili ezilabantu abalojayo eMurahwa Green Market eseSakubva lase Mutare lapho abalomgodi wegolide njalo.
Ibhayisikopo yamahala yenzakale ngeSonto emzini kaTsoriym njalo ize yaphela sokubizwe amapholisa afike athwala amadodakazi alapho ekhaya abasa enkambeni yamapholisa.
Ekhuluma lentatheli, uMary uthe yena labodadewabo bathwaliswe amagabha avuzayo ngondofa laba asebebaphambanisela imizi yabo. Uthe yiloba kunguye yedwa qha oyendileyo umendo kawumnandi ngenxa yemithanithani kayise.
UMary uthi nxa esekamelweni lakhe lokulala lomkakhe, inyoka zikayise ziyabuya zilande ukuzomenza umfazi.
“Inyoka lezi ziyabuya ziyinhlathu enkalakatha, zifika zenze umathanda kithi njalo ngaleso sikhathi ngiyabe ngibona umfanekiso kababa.
“Ezikhathini ezinengi umkami nguye ongivusayo athi “izivakatshi” zikababa sezifikile. Ngabe ayisikho ukuthi umkami uyazwisisa ngabe kudala umuzi wami wachitheka.
“Ngiyazi ukuthi ubaba ukhangeleka njani ngasese ngoba laye uyake abuye ezongenza akufanayo njalo ngiyambona emaphutsheni.
“Sisakhula, ubaba wayehlala esitshela ukuthi umnewabo nguye olabondofa abasihlukuluzayo ngoba uyasizonda,” utsho njalo uMary. UShylet uthe khathesi bahlala begcoba impahla yabo yangaphansi isawudo ngenhloso yokuxotsha ondofa bakayise.
