uMthunywa
Nomthandazo Ndlovu
KULENKAMPANI yakweleChina okubikwa ukuthi isivakatshele emahofisini eGwanda iveza isifiso sayo sokuthenga obabhemi kule indawo.
UMthunywa uzwe ukuthi obabhemi sebezathengiswa njengenkomo lembuzi embukisweni ngemva kokuba inkampani yeRuan Trading and Marketing Beef Company yeChina iveze ukuthi ifisa ukuthenga obabhemi eGwanda.
Ekhuluma loMthunywa uChief Executive Officer weGwanda District Council uMnumzana Ronnie Sibanda uthe kuliqiniso ukuthi inkampani yeRuan Trading and Marketing Beef Company ifike kibo izocela ukuthenga obabhemi emaphandleni eGwanda.
“Kuliqiniso ukuthi kulenkampani yakweleChina esike sakhulumisana layo elesifiso sokuthenga obabhemi bangapha eGwanda,” kutsho uMnu Sibanda.
Kubikwa inyama kababhemi iyikudla okumnandi kweleChina kungakho linkampani ibathandile obabhemi beGwanda ngoba bekhanya bengumhlobo olohlonzi.
“Inkampani le ithi inyama yabobabhemi iyikudla okumnandi elizweni lakibo ngakho balesifiso esikhulu sokuthi bathenge obabhemi beGwanda njengoba bengumhlobo omuhle, obabhemi laba bazakuyahlinzwa esilaheni esisedolobheni lakoBulawayo ibisihanjiswa kweleChina isiyinyama,” kuchaza uMnu Sibanda.
UMnu Sibanda uqhubekele phambili wathi leli kungaba linyathelo elihle kakhulu nxa kungaba lombukiso wabobabhemi ngoba lolahlekelwe ngobabhemi bakhe sengabathola lapho.
“Ubuhle obuzaba khona nxa lokhu kungaqhubekela phambili yikuthi lalabo abalahlekelwa ngobabhemi babo sebengabathola embukisweni lo njengoba wonke umuntu uyabe ethengisa lapho, njalo lalabo abangelankomo sebengathengisa obabhemi babhadalele abantwana indleko zesikolo,” kuqhuba uMnu Sibanda.
“Obabhemi sebebanengi kakhulu lapha emaphandleni eGwanda osekusenza ukuthi utshani bungakhuli kuhle, nxa bengathengwa kungasiza kakhulu ukwehlisa inani labo,” kutsho uMnu Sibanda.
UMthunywa uxhumane lesinye isakhamuzi esithe singuThandeka Nyathi esihlala eBuvuma esiveze ukujabula ngokuthi lalabo abangela nkomo sebezenelisa ukuziphilisa nanko phela abanye babo abalazo inkomo kodwa izibaya zigcwele obabhemi.
“Mina ngibona kuzakuba ngcono kakhulu lalabo abangela nkomo sebezabhadalela abantwana indleko zesikolo ngemali yabobabhemi abathengwayo, lokhu kodwa lakho sokuzadala ubusela njengoba abantu bayabe sebekwazi ukuthi obabhemi balemali,” kuchaza uNkosikazi Nyathi.
UMnumzana Dumisani Mlandjeni onguGeneral Manager walinkampani ezathenga obabhemi uthe obabhemi bayabafuna sibili.
“Okwakhathesi sisalungisisa isilaha lapho okuzabulawa obabhemi laba, ingahlolwa iphumelele sesizaqala ukuthenga obabhemi laba, bangabulawa inyama yakhona isizahanjiswa kweleSouth Africa lapho ezasukela khona isisiya kweleChina,” kuchaza uMnu Mlandjeni.
“Asikhethi labobabhemi abagogekileyo labangaboniyo siyathenga kuphela,” kuphetha uMnu Mlandjeni.
