uMthunywa
Mehleli Dube
IMFA yinto engajwayelekiyo njalo itshiya izihlobo labangane bedabukile emoyeni. Iyahlonitshwa nxa uhamba unyathela ngonyawo olulesizotha uthole abantu bezihudula angani balezafesane lalapho behleka kuhlekelwa phansi phela kusesatshwa ukuthi kuzathiwa imfa iyakujabulisa.
Bakhona asebelomkhuba omubi nxa kuthe kwehla ifu elimnyama uzwa sebesithi kanje wayeqedile ukulobola, bafunge batshaye phansi ngedolo bethi ngeke bangcwabe umufi nxa kungakhitshwanga yona leyo mali abayabe beyifuna.
Umdeni wakomkhwenyana ube matasatasa sokudingwa imali ukuze kungcwatshwe, phela ngubani ongavuma ukuhlala lesidumbu endlini abanye njalo ngabakhwitshiza ukuthi isihlobo sabo sigula sasingaphathwa kuhle uthole imideni yomibili isivukelene ukeketani, bathobelane njengeqhude lengalukhuni lizibona esibukweni.
Yikuhlukuluza isidumbu, ngcwabani umuntu libe selihlala phansi likhulumisane lihlawulisane, hatshi ukuthi isidumbu sisemotsha libe lokhe lidlala umacatshelana, phela banengi abayabe bedabukile emoyeni ikakhulu abantwana labazali, kufana lokuzama ukucitsha umlilo ngephethulo.
Bandla singathathi imikhuba esingayaziyo esikhipha ubuntu. Ayixhanxathwe ngemva komngcwabo. Yikho okwenziwayo esintwini. Asitshiyaneni lemikhuba engasiyo yethu ngoba yenza imuli kukhanye angathi ngeyamagovu afuna ukuvuka ngoba sokufiwe.
Ayixabene.
Umlobi ungamthinta ku: 0714355641