uMthunywa
Yinthatheli kaMthunywa
KULEJAHA leBeitbridge eselizisola ngokuthi lathapha uluju lwemvelo lomfazi womfowabo nanko phela alisenelisi ukwenza ucansi ngenxa yobuhlungu bamaphambili.
URichard Ndou ohlala edolobheni leBeitbridge uthi yena uhlupho alalo lwaqala ngemva kokuthi ahlangane lomkamfowabo emacansini eminyakeni emibili edluleyo.
UMthunywa ukhulumisane lomfakazi okhethe ukungabethwa ngegama othe uhlupho lolu lwaqala uRichard aze adle umfowabo izithende.
“Umfana lo uhlala ekhala ngamaphambili sonke isikhathi angaya emacansini lomuntu wesifazane.
“Abantu nxa bekhuluma bathi mhlawumbe uTrynos wafaka umkakhe ulunyoka ngoba ayizwisiseki sibili into yakhona, useze waliwa zintombi zakhe ezimbili ngenxa yendaba le,” kutsho umfakazi lo.
Ebuzwa ngodaba lolu uMnumzana Richard Ndou ulandule ukuthi uhlupho lolu lwadaleka ngemva kokulala lomkamfowabo.
“Uhlupho locansi ngilalo sibili kodwa angazi ukuthi utshelwe ngubani ukuthi lwabangelwa yikuthi ngalala lomkamfowethu, akusiqiniso lokhu, abantu bayangisukela nje.
“Okungizwisa ubuhlungu yikuthi uTrynos laye uyabakholwa abantu, seze wahamba lomkakhe eSouth Africa lapho asebenzela khona ngenxa yokungangithembi,” kuphetha uMnu Ndou.
Imizamo yokukhulumisana loMnu Trynos lomkakhe yehlule ngoba inombolo zabo azitholakalanga.
