uMthunywa
YiNtatheli kaMthunywa
KULANDELA udaba olwakhitshwa kuphephandaba leli, olwemuli yeSamlodi eGwanda ekholwa ukuthi umntwana welinye ilunga owafayo usengumatholwane njalo usegezisa amagonyethi edolobheni leli, sekuvele ukuba sokuqhamuke impi phakathi kwezihlobo.
Kudaba lolu kwavela ukuba kulehlekana lamalunga emuli yakoMsimanga afunga agomele ukuthi ayakwazi lapho okuloBevern Malunga owabhubhayo.
UMthunywa uzwe ukuthi izihlobo zika Bill ‘‘Ndivhi’’ Msimanga onguye owaveza udaba lolu sezimthembise ukumusa kubokhokho bakhe ngokuveza imfihlo le.
Kuzwakale njalo ukuba uRosina Msimanga laye onguye okholwa ukufanayo loNdivhi kasalazi lelanga ngoba esesaba ukubulawa ngamalunga emuli yakwabo.
UNdivhi uveze ukuthi usehlezi ephethe izibindi ngezandla ngenxa yomkamfowabo uEbelina Siziba osewamthembisa ukumhlahlela ngehloka.
“Ngeviki ephelileyo ngithe ngisesibholaneni uEbelina wangithola nginathisa izifuyo zami wangixotshanisa ngehloka.
“Angizange ngithande ukukhuluma okunengi kodwa ngabaleka ngisenzela ukuthi indaba le ikhulunywe sihlezi phansi njengemuli,” kuveza uNdivhi.
Uqhubekele phambili wathi okusolwa nguEbelina yikuthi waveza imfihlo yemuli emphakathini.
UMthunywa uxhumane loEbelina oveze ukuthi kasoze ayekele ukumhlahlela ngehloka uNdivhi ngoba egila umkhuba wokuhamba eveza imfihlo. Uveze ukuthi lanxa umntwana lowo ekwazi ukuthi ungaphi, akumelanga ahambe ekukhuluma ilizwe lonke.
“Ngeke ngivumele indoda endala iphambanisa, kawukho umuzi ongathunqi ntuthu. Pho eyethu siyehluke njani kweyinye engaze iphumele phandle lakumaphephandaba?
“Angisoze ngidele ngizambulala kuphela ukuze siphumule imisebenzi yakhe yesifuba esakhatshwa lidube,” kutsho uEbelina.
UMthunywa ukhulumisane loRosina waveza ukuthi yena waphosa waqamuka mhla uEbelina ehlasela emzini kamnewabo wasizwa yikuthi wangena kwenye indlu wakhiya umnyango.
“Kwaba lesiwowowo mhlalokho komnewethu, kwakunzima sibili umkamnewethu ethwele inkalakatha yebhewula.
“Ngagijima ngangena endlini ngakhiya umnyango, wabuya wakhwaza ephandle waze wadela wahamba,” kutsho uRosina.
Uthe abantu sebehlala bephethe izibindi ngezandla ngenxa kaEbelina lo osehlala ebafungela ukuthi uzababulala.
Udaba lolu luzakuyahlalelwa phansi enduneni emavikini alandelayo.
