uMthunywa
Cornelius Luphahla
KULABOSOBHUKU besigabeni seMzinyathini osekuvele ukuthi sebekhathazile ngokuthengisa umhlabathi ngudlu kanye lokwethusela izakhamizi, uMthunywa ukuzwile lokhu.
Osobhuku laba abagoqela uMnumzana Sindiso Moyo owesiqintini seBayethe, uGallet Masuku wakoGodlwayo 2 kanye loDecember Ncube ongusobhuku weMpisini.
UMthunywa ugodle njalo amagama abantu abathengiselwa imizi ngemali langenkomo ngosobhuku laba.
UMthunywa uxhumane loNkosazana Elizabeth Mathobela ongusobhuku esigabeni seMpisini waveza ukuthi uMoyo wathathela intandane umuzi wawuthengisela esinye isakhamuzi.
“USindiso Moyo wathatha umuzi owawungoka muyi uTshuma wawunika esinye isakhamuzi ngaphandle kwemvumo yethu njengezihlobo zikamuyi.
“Ngikhuluma nje abantwabakaTshuma abalandawo yokuhlala bangakhula. Ngizwa ubuhlungu kakhulu ngalesisihluku esenziwa nguMoyo ebantwaneni abazintandane,” kulandisa uNkszn Mathobela.
Esinye njalo isakhamuzi esithande ukubizwa ngokuthi nguMaphosa sibikele intatheli ukuthi uNcube uyathengisa imizi yabantu.
“UNcube uyathengisa imizi njalo uyithengisela abantu abavela endaweni ezikhatshana ngemali langenkomo,” kuchaza uMnu Maphosa.
UMthunywa wenelise ukukhuluma loMnu Sindiso Moyo ecingweni wathi ubhicwa ngodaka nje.
“Angizange ngithengisele muntu indawo, abantu bayangigcona nje ngoba bayangizonda. Abatsho njalo ngabafuna ukuthi ngikhutshwe ekubeni ngusobhuku kungene bona,” kulandula uMnu Moyo.
Kuzwakale ukuthi uMnu Gallet Masuku ongomunye wabosobhuku abenza ubugwelegwele lobu nguntando kayiphikiswa kulesisigaba sakoGodlwayo nanko phela uthathela ezinye izakhamizi indawo kunye lamasimu.
Ekhuluma lentatheli uMnumzana Thengi Manga ubike ukuthi uMnu Masuku wathatha umuzi womntanakhe obhalwe ibizo likaMpumelelo Moyo wawunika esinye isakhamuzi.
“UMasuku wathatha umuzi womntanami owawulekheli elithi 26B wawuthengisela uSikhangezile Moyo wasewuguqula usiba lekheli elithi 7B. Impahla ezazikhonapho bazikhiphela phandle zachitheka ngikhuluma nje akusalanga lutho.
“Umuzi lo lokhe ngiwuthelela ekhansilini yeSigodini noma nje ngawuthathelwa,” kulandisa uMnu Manga.
Esinye njalo isakhamuzi uMnumzana Moffat Khanye, esathengiselwa umuzi uthe etshayelwa ucingo nguMthunywa waqala wala ukuthi wathenga umuzi kodwa wasevuma ngemva kwensuku ezimbalwa ukuthi ngempela wawuthenga kuMasuku.
“Mina ngathenga umuzi kuMasuku nge$800 wathi yiyo indlela okutholwa ngayo imizi kule indawo. Ngathi ngibuza kwezinye izakhamizi zangitshela ukuthi azizange zithenge imizi kodwa zayiphiwa yikhansili,” kutsho uMnu Khanye.
UMthunywa uzwe njalo ukuba omunye wabosobhuku laba wathatha amazenge okwakufanele kufulelwe ngawo isikolo wawathengisa.
“Omunye wabosobhuku laba wathatha amazenge angu-14 ayengawendlu yekhiwa wawathengisela uEthan Sibanda ohlala esigabeni seZimbili kwathi amanye wawathatha kanye lezitina zakhona wakha ngawo indlu yakhe.
“Amazenge lezitina lezi kwakufanele sakhe isikolo njengoba kungelasikolo esigabeni sakithi koGodlwayo. Isikolo lesi esasesisakha kuthiwa yiDickson Nature Sibanda Primary, ngikhuluma nje lakhathesi simile ngenxa yesenzo sikasobhuku lo,” kulandisa uMnumzana Walter Moyo.
UNkosazana Priscillar Ndlovu ubike ukuthi uMnu December Ncube ongusobhuku esiqintini seChiyangwe ngomunye wabosobhuku abahlalisa abantu okungekho emthethweni.
“UNcube wahlalisa esinye isakhamuzi endaweni yabantwana bakamfowethu owabhubhayo uAnaniya Ncube engazange akhulumisane lathi,” kutsho uNkszn Ndlovu.
Esinye njalo isakhamuzi sakule indawo uMnumzana Obert Ndlovu sichaze ukuthi abantwabaso bayancitshwa indawo yokwakha.
“Mina ngilabantwana abathetheyo ababili kodwa nxa ngibika kusobhuku uyala ukuthi babhalwe eluhlwini lwabafuna indawo zokwakha. Isimanga yikuthi usuka abhale abantu abavela endaweni ezikhatshana etshiya abantwabethu,” kuchaza uMnu ndlovu.
Ekhuluma lentatheli uMnu December Ncube ubike ukuthi abantu bayamgcona nje kodwa kazi lutho.
“Mina ayisimi engipha abantu indawo, baphiwa yikhansili kungakho bona basuka bagcone mina ngingelacala.
UMathuthu abathi ngamnika indawo wayiphiwa yikhansili,” kuchaza uMnu Ncube.
UMnu Mathuthu uthe kazange athenge umuzi njalo wakhele khatshana lomuzi wakoNcube.
“Mina indawo yokwakha ngayiphiwa yikhansila angizange ngawuthenga kuNcube njalo angihlaliswanga ensimini yomuntu ngisendaweni yemizi. Umthelo ngiwubhadala emawofisini eSigodini njengesakhamuzi esaziwa yikhansili,” kuchaza uMnu Mathuthu.
UMthunywa wenelise njalo ukukhulumisana lenduna yakule indawo uMnumzana Zephania Sigola yachaza ukuthi osobhuku laba liqiniso ukuthi bayathengisa umhlabathi.
“Kuliqiniso ukuthi kulabosobhuku abenza ubugwelegwele kungakho sengabaxotsha lanxa belokhu besalela ezikhundleni njalo lokhu beqhubeka bethengisa umhlabathi okuyinto engavunyelwayo njalo nguhulumende wethu,” kuphetha induna uSigola.
