uMthunywa
Cornelius Luphahla
KUDABA olusansumansumane kulesalukazi sesigabeni sakoNqakala eMbembesi okucatshangelwa ukuthi besilomthanyelo ebesithi singawusebenzisa ukuthanyela iguma kufe abantwabaso.
Kubikwa uNkosazana Joyce Sibanda ubesebenzisa umthanyelo lo ndawonye lomganu njengempahla yobuthakathi.
Isiga lesi sivele kuviki ephelileyo lapho uNkszn Sibanda atholwe elomganu lomthanyelo lo okhutshwe ngabaphurofethi okucatshangelwa ukuba kade ewugada esiyakhunkula njalo athi angathanyela ngawo kufe abantwabaso.
UMthunywa uvakatshele kule indawo wakhulumisana lesinye isakhamuzi sakule indawo uNkosikazi Simelinkosi Moyo wachaza ukuthi kuliqiniso ukuthi uMaSibanda watholakala elempahla le.
“Mhla kukhutshwa umganu lomthanyelo koMaSibanda sasibuthene njengezakhamizi njalo abaphurofethi baveza ukuthi umthanyelo lo uyawugada ebusuku esiyakhunkula ethwele umganu wakhe ayabe efakele khona imithi yakhe,” kutsho uNkkz Moyo.
Uqhubekele phambili njalo wachaza ukuthi abaphurofethi laba babuya njalo bathi uMaSibanda nguye oseqede abantwabakhe.
“Abaphurofethi baveza njalo ukuthi uMaSibanda seqede abantwabakhe ngokubathanyela bafe. Bathi ubethi engathanyela phansi ngawo kufe umntanakhe oyedwa kumbe umzukulu seze wasala lomntwana oyedwa phakathi kwabalutshumi,” kutsho uNkkz Moyo.
Ebuzwa ngale indaba uNkosazana Joyce Sibanda uvumile ukuba abaphurofethi bakhuphe umthanyelo lomganu emzini wakhe.
“Kuliqiniso sibili ukuthi abaphurofethi bakhiphe umganu lomthanyelo emzini wami. Bathi umthanyelo lo bengihamba ngawo ebusuku ngisiya eGoli ngithwele umganu njalo nxa ngihamba lapha ngiyabe ngingazizwa ngoba ngiyabe ngisetshenziswa lidlozi elibi engilalo.
“Babuya njalo bathi yikho inyawo zami zihlala zibuhlungu yikuhamba lokhu engikwenzayo ebusuku.
Ebuzwa ngokuthi sesele lomntwana oyedwa uMaSibanda uvumile.
“Yebo kuliqiniso sibili ukuthi sengaphelelwa ngabantwana, babelitshumi kodwa sokusele oyedwa. Noma nje bathi bengithanyela kufe abantwabami kodwa lokhu angikwazi ngoba abantwabami babebulawa ngumkhuhlane lo osugcwele elizweni,” kutsho uNkszn Sibanda.
Usobhuku wakule indawo uMnumzana Vanish Nkomo uchaze ukuthi laye uyayazi indaba yokukhutshwa komthanyelo lomganu emzini kaNkszn Sibanda.
“Lami ngakuzwa ukuba kwaphuma umthanyelo lomganu koMaSibanda kodwa ngangingekho ekhaya ngangiseBattlefields okwakubhubhe khona umfowethu,” kuphetha uMnu Nkomo.
