uMthunywa
Bongani Ndlovu
KAZISAKWAZI ukuthi zikhangele ngaphi izakhamizi zeCowdray Park koBulawayo ngokugcwala kwamajazi abakhwenyana egangeni nanko phela sekuvele ukuthi omahotsha bakule indawo sebekhetshelwa egangeni.
Ekhuluma lentatheli kaMthunywa uNkosazana Ntokozo Maphosa ohlala buqamama leTerminus uthe omahotsha bakule indawo babonakala belamadoda egangeni osekusenza kugcwale amakhondomu asebenzileyo indawana yonke nje okwenza impilo zabantwana zibe sengozini ngoba belakho ukudobha badlalise.
“Lokhu ngathwetshulwa yingwe kangikaze ngikubone okunje ukuthi owesifazana uyazikhangelela phansi okokuthi angaze abone kuqondile ukusebenzisa iganga njengendlu ngoba efuna imali.
“Lokhu kuyayangisa kakhulu njalo kwehlisa abesifazane isithunzi. Ngaphandle kwalokho ukuphosela amakhondomu indawo yonke kufaka abantwana abancane engozini yemikhuhlane ngoba belakho ukuwadobha,” kutsho uNkszn Maphosa.
“Lathi esihlala khonapha siwathanyela nsuku zonke amajazi abakhwenyana ekuseni sesize sivuka ngovivi ukuze abazukulu bathi bevuka sesithanyele salahlela khatshana leyo ngcekeza,” kuveza uNkszn Maphosa.
UMnumzana Hillary Mukume olendawo yokugela inwele ugcizelele wathi ubutshapha babomahotsha sebubunengi kakhulu.
“Abantu abasazihloniphi phandle lapha, kubizwa kuthiwa yini nxa umuntu engaselanhloni aze akhethe ukudla isithelo semvelo endaweni eligceke kanje. Kusegcekeni ukuthi omahotsha laba benza lokhu ngoba bethanda imali,” kuveza uMnu Mukume.
Intatheli kaMthunywa ibuye yaxoxisana njalo loMnu Blessing Mushore laye ovumileyo ngobutshapha babomahotsha uthe igcekeza yabo isisenyanyeka.
“Kuliqiniso ukuba abangela ndawo zokuya labantu babo lalabo abathenga isikhathi esincane kubomahotsha, baqonda egangeni ngoba kusitha izihlahla ngoba abanye ngabantu abathetheyo kodwa okubi yikuthi kabasahloniphi umhlaba njalo bayatshiya ingcekeza yabo khonapha,” kutsho uMnu Mushore.
Ukhansila wendawo le, uKhansila Kidwell Mujuru uthe imizamo yokuhlangana ezwe izikhalazo zezakhamizi isisehlelweni.
“Kuliqiniso ukuba izakhamizi sezike zabuya ukuzongibona ngohlupho lwabomahotsha abasesigabeni ngoba izenzo zabo zisuka zibe yingozi ebantwaneni abancane ngoba batshiya amakhondomu asebenzileyo egcwele yonke indawo yona imikhuhlane isiminengi.
“Sesazama ukukhulumisana lamapholisa ukuba engezelele lawo abhodayo ebusuku kodwa kunzima ukubabamba ngoba bayacatsha sibili,” kuveza uKhansila Mujuru.
