uMthunywa
YiNtatheli kaMthunywa
ABABONA ngezomumo womkhathi abeMeteorological Services Department (MSD) sebexwayise uzulu ngemvimbi kanye lokuduma kwezulu okukhona elizweni lonke jikelele okuzabangela izikhukhula ezabelweni ezibalisa eMatabeleland South, Bulawayo, Matabeleland North, Midlands, Masvingo kanye lendawo eziseningizimu yeManicaland.
Ababona ngezomkhathi baveze ngoLwesithathu ekuseni ukuthi kuzakuba lezulu elinengi eledlula i-50mm ngosuku lunye njalo lizakuna kusukela ngoLwesithathu kusiya ngeSonto.
Uzulu uxwayiswe ukuthi aqaphele izikhukhula zezulu, ukudilika kwezindlu kanye lokuwa kwezihlahla.
“Qaphelani emigwaqweni, kanye lokuphazima kwezulu. Lingalingi lizame ukuchapha imifula egeleza igijima, imfula egcweleyo, izifudlana ungabe uzihambela loba utshayela.
“Hlalani zonke izikhathi likhangele abantwana kanye lalapho abakhona,” kutsho isitatimende lesi.
Kubikwa ukuna kwezulu leli kubangelwa yibumanzi obuvela emayezini aseBotswana. Izulu leli elizayo, lingabangela izikhukhula ngoba kulindeleke ukuthi indawo ezisentshonalanga laseningizimu yelizwe zithole izulu eliphezulu kwesilinganiso se-50mm.
Ukuna kwezulu kungaba yisibusiso kuzakhamizi zakoBulawayo eziphakathi kodubo lokusislela kwamanzi nanko phela sezithembele kudamu leMzingwane elisesabelweni seMatabeleland South.
