uMthunywa
Ncekwenhle Ncube
UMLOBI njalo eyingcitshi kwezembali uMnumzana Paul Damasane ukhumbuze uBulawayo ngokuqakatheka kwamasiko lemikhuba ngoLwesihlanu eBulawayo National Arts Gallery.
Amazwi la uwakhulume ngesikhathi iAmagugu International Heritage Centre ikhipha ngokusemthethweni ugwalo lwayo oluqukethe ubungcwethi bamasiko bezigaba zeMatopo.
UMnu Damasane uchaze ukuthi isizwe sesitshabalala ngenxa yokuthi abantu abanengi sebehlanekela umdabuko lamasiko abo.
“Isizwe siba yisizwe ngenxa yamasiko aso. Kungakho nje uzulu kumele aziqhenye ngamasiko akhe. Lokhu kuzaphathisa ukuthi abekwazi lapho avela khona.”
Ugwalo obelusethulwa lwalotshwa ngabe Amagugu njalo luqukethe imisebenzi yezandla eyenziwa nguzulu eMatabeleland South egoqela imbazo, ukweluka, amacansi kanye lezomculo.
“Siyitshayela ihlombe iAmagugu ngomsebenzi omuhle ongaka wokuthatha ithuba layo ilonde imisebenzi yezandla ukuze ikusasa ibonakale njalo yenelise ukuthengiswa njengalokhu okwenziwa kwamanye amazwe.
“Siyethemba lokhu kuzaphathisa kakhulu ekuthuthukiseni ilizwe lakithi kwezomnotho ngoba imbazo yesintu inhle njalo iyabukeka nxa icecisile,” kutsho uMnu Damasane.
Uqhubekele phambili echaza ukuthi inengi labantu elichothoza inyanga zesintu bezibiza ngabathakathi yibo abahamba ngomnyama besiyadinga usizo lwazo.
UMnu Damasane ubuye wathi bafisa ukuthi ilizwe likhule kwezomnotho kusetshenziswa ukuthengiswa amasiko njengalokhu okwenziwa yiHollywood, Nollywood leBolywood. Ukutsho lokhu ngoba enanzelela ukuthi abantu bamazwe la sebephumelele kakhulu ngemidlalo yabo le ebonakala kubomabonakude.
