uMthunywa
Cornelius Luphahla
ANGITHI nje kuthiwa kusinwa kudedelwana okuchaza ukuthi ihlobo lidedela ikwindla, lalo lidedele ubusika, ubusika buyitshaye eyabo ingquzu budedele intwasa, layo iyiphose induku ebandla idedele abanye njalo njalo.
Nanku-ke khathesi insuku sezisunduzene aze asondela amalanga ombukiso weZimbabwe International Trade Fair ozakuba lapha koBulawayo emzini wamakhosi.
Abanye sebewulindele ngamehlo abomvu sebefisa lokuthi ngabe iba kusasa, kanti nkani amalanga ahamba ngokuthanda kukaMdali. Kunjalo-ke abanye khonapha sebefisa lokuthi ngabe amalanga ayama ngoba bengakalungiseleli ukuya embukisweni lo.
Abanye abantu khathesi sebelolonge bacombacomba impahla zabo belungiselela umbukiso lo ozayo kuthi abafuyi labo sebeze bezigezisa izifuyo zabo bekhangelele ukuthola umvuzo walo umbukiso ozayo. Akwaziwa ukuthi iyozala nkomoni, ngeqiniso zindala zombili lonyaka kwezombukiso.
Angithi nje labo abazithembileyo kwezokubaza, ezokufuya, ezokuthunga, ezokulima, ezamabhizimusi kanye leminye imisebenzi etshiyeneyo, bazabe bencintisana embukisweni omkhulu wakuleli kuyonale iviki ezayo khonapha koNtuthuziyathunqa. Yikho-ke okuzabe kuguga othandayo, njalo lamehlo azabuka aze adele njengoba kuyabe kugcwele ingcitshi lengcitshikazi.
Into esuka imangalise yikuthi kwakuthi nxa kuzinsuku zeTrade Fair abantu bathabe baze badabule imbeleko ikakhulu ontanga. Asazi-ke ukuthi bayabe bethembe ukuthi ensukwini ezizayo bazabhajulwa ngani. Uthola abantwana ikakhulu abasafundayo sebedakwe bengasazazi lokuthi bangobani. Asazi kumbe abazali babo bathini nxa bebabona befika benje ezindlini.
Ngalokhu kangitsho ukuthi ontanga bengayi ekujabuleni lokhu kodwa kuqakathekile ukuthi bazinanzelele ukuthi basafunda bengaze baxotshana lezidakamizwa kabaqakathekise imfundo. Abanye abantwana ikakhulu ngosuku lokucina lweTrade Fair langakibo kabafiki baze bayofika kusasa. Asazi lokuthi nxa befika bathi bavela ngaphi ebazalini babo.
Mthwakazi kaNdaba kuqakathekile ukuthi abantu nxa besiya kuTrade Fair bajonge ukuyazijabulela kuphela hatshi okunengi ngoba kuvame ukuthi abanye balale sebesezandleni zomthetho ngenxa yokungaziphathi kuhle.
Amasela kanye lezigebengu kuvame ukuthi atholakale khonapha emkhosini lo asazi kumbe lawo ayabe ezobukisa ubusela bawo kuthi izigebengu lazo zizobukisa ubukliwi bazo.
Njengoba kunjalo labo abalande ukuzobukisa imisebenzi yabo emihle bazathola imivuzo yabo emihle kuthi labo abazobukisa imisebenzi yabo emibi labo bazathola okubafaneleyo njengoba leBhayibhili elingcwele lisithi umuntu wamukeliswa umvuzo ngokwemisebenzi yakhe.
Ngilethemba lokuthi kakho ozazidonsela amanzi ngomsele njengoba sengiyiphosile induku ebandla, ingqobe sisele kini bakaMthwakazi ukuthi lizikhethele elikubona kukuhle empilweni zenu. Bonke abasafuna ukuphila impilo enhle bazavakatshela kule indawo ngenjongo yokuyajabula kanye lokuyabukisa impahla zabo hatshi ukuyaganga.
