uMthunywa
Cornelius Luphahla
NJENGOBA nje lisazi bakaMalandela ukuthi inkuthazo kanye lokubonisana yinhlalo kaMthwakazi ngakho namhlanje ngize njalo ngolunye uhlangothi ngikhuthaza ngesiphatho esihle ebantwaneni abancane. Lapha ngichaza ukuphathwa okungeladlame kumbe ukuhlukuluzwa ebantwaneni.
Ngitsho nje ngoba sokukanengi sisizwa ngokuhlukunyezwa kwabantwana emakhaya kanye lemadolobheni, asazi ukuthi kusuka kungeneni enhliziyweni zabantu bakoMthwakazi. Kambe ngubani ongakujabulela ukuhlukunyezelwa umntanakhe ngomunye umuntu? Nxa engekho pho abakwenzayo bakwenzelani?
Ngilethemba lokuthi inengi labantwana abahlala ezitaladeni lasuswa yikuhlukuluzwa ngakibo. Isimanga yikuthi bonabo ababahlukuluzayo basuka balibale ukuthi nxa besenza lokhu bayabe bezigwaza ngophuma emvuthweni ngoba abantwana laba baphetha sebebakhuthuza njengoba bayabe bekhulele ngaphandle kwembeleko baswela ongabalaya ukuze bazi ukuphila kuhle labantu.
Ngikhuluma nje bakhona abazali abahlala labantwana abangasibabo ababaphatha ngochuku. Umntwana onjalo uthi nxa ufika umthola etshotshobele enye indlela ezwisa usizi kukhanya ukuthi kukhona okumkhathazayo. Into esuka idanise yikuthi esikhathini esinengi umzali lo oyabe ehlukuluza umntwana uyabe elikholwa ethi engangena enkonzweni ahlabele kuvungame ibandla lonke. Asazi ukuthi uyabe elikholwa elinjani elingelasihelo.
Esikhathini esinengi umntwana onjalo engaba ngoyinkazana khona nguye uzithelile. Ngitsho ngoba kuvame ukuthi izihlobo eziyizigangi zithole umuntu wazo wokubhinya. Lowo-ke kungaze kuzwakale ukuthi uyabhinywa uhle atshelwe ukuthi engavele abikele abantu uzahle axotshwe kuleloguma ayehlala egangeni. Lapho umntwana engezwa lokho uzakubhensela ukubhinya lokhu afane lobabhemi wakoNkohlo owabonwa ngabantu.
Ngabe kuyangami bonke abahlukuluza abantwana bebezagwetshwa isigwebo esikhulu kakhulu ngoba yibo abababulalela ikusasa labo. Ngitsho ngoba esikhathini esinengi umntwana okhula ehlukuluzwa ikakhulu oyinkaza uhle azidele abone kungcono ukwenda esasemncane ezama ukuzivikela kulesisandla esilukhuni.
Ekwendeni lapha kuvame ukuthi umntwana athathwe ngumuntu omdala laye enanzelela ukuthi umntwana lo uswele lapho angaya khona. Kuthi kunjalo lalowo omkhulise emhlupha amukele ngezandla zonke imali yamalobolo khonapho abakhe abantwana abadala kulalowo osemendisa besesikolo. Angithi yiwo umona lo esikhuluma ngawo ukuba kawufanelanga wenziwe lapha koMthwakazi.
Okusuka kuzwise ubuhlungu yikuthi inengi labantwana abaphathwa ngochuku kanje baphetha bezidela ngokuthengisa imizimba yabo okudala ukuthi bathole umkhuhlane kuthi abangabafana baphetha besiba yikudla kwejele sebephule umthetho.
Kambe buyabe busasekhona na ubuntu nxa abantu bengaphathana kabuhlungu kanje? BakaMthwakazi khuthazanani ngokuqakatheka kozwelo kanye lesihelo ngoba kubi osokusenzakala lapha njalo kubulala ikusasa kaMthwakazi.
