uMthunywa
Mehleli Dube
IZOLO bekuthi nxa iqhikiza lakuthatha amehlo, uzwe lenhliziyo igcwala amakhaza, kubangwa luthando olwamampela luphuphume uzizwe usindwa yisifuba sakho.
Ijaha lalicwayisisa kabanzi ngentombi lidingisise kabanzi ukuthi izalwa kobani ijaha lize kwesinye isikhathi lilande uyisekazi wentombi limethulele uthando elifuna ukulunikeza umntanomfowabo.
Phela ijaha lalithi lithande intombi lingakufihli ngoba lisenzela ukuthi loba sekonakele, bakwazi ukuthi bazokhomba kubani wakabani. Sasingekho isikhathi sokudlala umacetshelana, okwamagundwane abalekela ukuphazima kwezulu lensewula.
Ensukwini zalamuhla sokwehlukile, abasakuthathi mango amajaha ukuqonywa, sebemane nje bathathe umakhalekhukhwini bantinyize inkinobho atsho ukuthi ufuna intombi enjani, kwesinye isikhathi baze baye lemisakazweni lakumaphephandaba bedinga lona uthando, kungakhathalekile ukuthi leyo ntombi abakaze bayibone mathupha.
Into esuka ingidide yikuthi uyathola ijaha elileminyaka elitshumi lambili lanhlanu lithi lifuna umuntu wokutshada laye oleminyaka engatshumi amathathu lanhlanu njalo olemali, baze bengezelele bathi lolendlu lemota.
Lolo kalusilo thando, yikho nje uzafica ukuthi umtshado wakhona uphanga utshabalale njengomlilo wamahlamvu ebusika. Bakhonone abazali bejaha ngoba bengakujabuleli ukuthi umntanabo ahohobise isalukazi esingasela sobho lomnkantsho.
Uzwe kwesinye isikhathi baze bahlube indlubu ekhasini bathi leso sikhekhembane sesalukazi ngesakho wedwa, kwelabo iguma ngeke alugxobe umalukazana. Ngenxa yokuthanda imali lenotho yalumama, aqinise ikhanda okwekhemeswane eliseselithanga likhomba ukuthi alikavuthwa.
Akhohlwe ujaha ukuthi umtshado yinto okumele ihlanganise izihlobo labangane, njalo iqinise ukuzwanana lokubambana komdeni, ukwenzela ukuthi loba sokuvela izigameko ezifana lokufa lokugula benelise ukukuxhasa uthole usekelo, olungela ntandabuzo.
Inengi lamajaha akulezinsuku abasathandi ukusebenza gadalala benakekela imuli zabo sebegijimela kubo laba omagida sibhekane ngoba uyabe ephathwa okweqanda lesikhukhukazi esiqala ukubekela. Uthola kwesinye isikhathi lowomuntu ahlalisana laye elabantwabakhe abathathu yena engela loyedwa, kwesinye isikhathi loba ezibonela ukuthi lapha akusela maqanda, anamathele okwempukane ebanjwe yinofi yegonde, ngoba ethanda leyo mali.
Ikhuba lendoda liyaphuza ukuthundubala, dinga ongaphansi kwakho ukuze ukholise uhambo lwakho.
Ayixabene.
Umlobi uthinteka ku: 0714355641
