uMthunywa
Cornelius Luphahla
UKUSA kwamalanga kuveza ukuhamba kwesikhathi okuyikho okudala ukuthwasa komnyaka. Ngokunjalo umyaka munye ngamunye uza lezawo indaba ezijabulisa umoya lezibuhlungu. Njengoba nje sisungula umnyaka omutsha kukhulu okuza lawo njalo zinengi ezinhle lezimbi esizahlangana lazo kuwo.
Phela abadala babeyitshaya ekhaleni nxa babethi ikusasa kalaziwa. Yikho-ke esikhuluma ngakho lapha ukuthi kakho okwaziyo ukuthi umnyaka lo uza lani njalo usiyakuthi goqo kuzabe sokwenzakaleni empilweni yakhe.
Kwabanye kuzaba yinjabulo uze uyethwasa kuthi kwabanye zizampompoza izinyembezi kuze kuye valwa. Konke lokhu kuyabe kuhlelwe nguMvelinqangi onguye umninimpilo. Loba kunjalo kwakube kuhle ukuthi lathi esiphilayo sizame ukuzivikela ensizini zomhlaba. Ngitsho ngoba inhlelo esizihlelayo yizo ezakha ikusasa lethu loba nje kuthiwa kalaziwa.
Angithi bathi umuntu wotha umlilo awuphembileyo nje. Nxa kunjalo kwakube kuhle ukuthi ngesikhathi somqando siphembe umlilo uqobo hatshi uthuthu funa amakhaza asihlasele. Ngikhuluma nje bakhona abantu abalenjongo zabo ezehlukeneyo lonyaka okuyizo ezihlela impilo zabo.
Phela abanye ngikhuluma nje lonyaka bajonge ukugqekeza endaweni ezehlukeneyo kuthi abanye ngabazimisela ukusebenza gadalala ngenhloso yokuzithuthukisa. Kukhona njalo abanye abajonge ukuchitha imphefumulo yabanye ngendlela ezehlukeneyo bengazi ukuthi kuyibubi kuMvelinqangi.
Ngokunjalo bakwethu kakho olesifiso sokulahlekelwa yimpilo yakhe emnyakeni lo kodwa isimanga yikuthi bakhona abafisa ukuchitha imphefumulo. Kwakube kuhle ukuthi uzulu aphile ngokuthula ukuze ingozi zingamhlaseli njengoba zivamile nje.
Phela sesingathi umnyaka uze lenhlupho kukanti yithi esizidingayo ngakho kuhle ukuthi sihlale ngokuthula. Yebo phela izigelekeqe zikhona emphakathini ngakho ukuze sizixwaye kwakube kuhle ukuthi sinanzelele isisusa sazo.
Okwakuqala njengoba umnyaka uthwasile kwakube kuhle ukuthi abantu bananzelele empilweni bengaze bahamba ebusuku ngoba kuyinto embi kakhulu. Ubusuku lobu yibo obudala ingozi ezifana lokuhlaselwa yizigebengu njengoba nje zivame ukuhamba ebusuku. Izinyamazana eziyingozi lazo zivame ukuhamba ebusuku ngakho kwakube kuhle ukuthi sizixwaye ngokungahambi ebusuku.
Angithi alikho elazikhotha emhlane ngakho labo abaphila ngobugebengu labakhunkulayo kabadele izenzo lezi ezimbi njengoba umnyaka uthwasile funa bathole umvuzo obafaneleyo. Kulabo njalo abatshayela izimota kukhona abajwayele ukugijima kakhulu ngakho kuhle ukuthi bahambe ngobuqotho ukuze bazivikele engozini zemigwaqo.
Njengoba umnyaka uthwasile kuveza ukukhula komuntu munye ngamunye ngakho kwakube kuhle ikakhulu kubafundi ukuba babambelele ngamandla ukuze bakhe ikusasa labo ngoba akukhulwa nyovane.
Bakwethu ngilethemba lokuthi sizaphila ngokubambana sisebenze ndawonye ukuze sakhe ikusasa lethu sithuthukise isizwe sethu. Udlame kanye lolunya kasikudedeleni izinyamazana zasendle.
