uMthunywa
Mehleli Dube
ZIZALWANE zeZimbabwe ngimadolonzima, ngome amathe emlonyeni ngengozi yamanzi ehlele abanye bethu empumalanga kunye lamazwe esakhelene lawo. Ye, khona ukufa kuvele kuyinto ebuhlungu loba ngabe kuza ngandlela bani, ngitsho labo abathakathi esikholelwa ukuthi kwezinye izikhathi yibo ababangela ukufa labo bayadana bachiphize izinyembezi, kukhomba sobala ukuthi ukufa khona kuvele akusinto enhle.
Loba esekucaphulile umuntu umgalele ngenkunzimalanga yesagila, aye kogoqwa nyawo, unembeza wakho ukuthonisisa lawe uze uyekufa. Baphelile abantu lezakhiwo zabhidlika khepha lokho bekungeke kwanqandwa muntu kodwa kuyintando kaSomandla. Abakholelwa kuthesitamende endala bathi ungabona kusibanje mhlawumbe uMvelinqangi ukhombisa ulaka lwakhe ngempambaniso enziwa yizidalwa zakhe thina abantu ngoba yithi phela asipha ingqondo ukuze sihlahlule okuhle lokubi.
Kube buhlungu ukubona izidumbu zindenda emanzini ezinye zivunjululwa phansi enhlabathini. Mina lawe asiphathise ngakho esikwenelisayo, lalabo abazakhokhela ukuyafikisa uncedo olukhitshwa ngabantu lingabi ngamahaga ufice selithethe okunye layakutshwathika le emqamelweni, silimuke ukuthi kulomutsho wesintwini othi abafileyo bayabona.
Kungenzeka uthathe izinto ezikhutshwa ngabantu, uzise lapho ezinganxwanele khona, kanti suzikhokhele imimoya ezakuhlukuluza empilweni yakho uswele longakusiza. Ngalesi sikhathi kumele sibe moya munye siqakathekise ubuZimbabwe bethu, ngitsho kanye labamabandla ezinkonzo kumbe awezombangazwe, asihlabeni phansi ngedolo, sibambane sibe yimbumba sicele eNkosini, yona engahlulwa lutho, sicele asengezelele umoya wokupha lokuphathisa axotshe umoya wobuhaga lobugovu. Ungabi nguloya ojabulela ukuhuquluza impahla ezikhutshwa ngabantu. Wonke umuntu ozabe encedisa abelenhliziyo emnene lesandla esilozotha, singafikelwa ngumoya wokuthi akusizihlobo zami ngeke ngiphathise. Siwukhiphe lowo moya sijikele le endongeni zeJericho. Ngizacina ngomthandazo omfitshane, “Nkulunkulu Somandla ngalesisikhathi sobunzima esibhekane laso thela umoya wokuphathisa lokubambana ukhiphe owobuhaga ukuze uncedo olukhitshwa ngabantu lezinye izizwe lufinyelele lapho olufanele luye khona. Amen.”
Ayixabene. 0738305027
