uMthunywa
BAKAMALANDELA bakhona abangakukholwayo ukuthi abakhunkuli basasekhona emhlabeni noma nje kusenzakala njalo kubonakala kusa kwamalanga. Ngalokhu lamhlanje ngiqonde ukuqothula imbokodo lesisekelo ngingatshiyi ngitsho lacezwana ukuze uzulu akubone sobala.
Angithi ngethuba okhokho besaphila abakhunkuli laba babevele bekhona kodwa phela kwakuthi nxa umuntu ebanjwe ekhunkula abhukudwe ajuqwe kungabi ndabazalutho. Yikho nje kwakuyinhlaka yotshani ukuzwa kuthiwa kubonakale umthakathi ngoba abathakathi babesesaba ukuba bengaya kwelusa amadada kungabi ndabazalutho.
Ngempela baqinisile abadala ukuthi ilizwe lalakhile.
Angiyilibali-ke indaba yeqhawe elikhulu likaMzilikazi uMqengwana okwathi ngemva kokuba izanuse zenkosi uMzilikazi zithe nguye othakatha inkosi waxotshwa elizweni noma nje wayeliqhawe elikhulu wayahlaliswa khatshana.
Kanti akusiLukukusi yini owayethakatha ngempondo ezazivala izulu koMthwakazi ebanga indaba kaDambisamahubo owabaleka kufanele asuselwe amanqe ngemva kokuphatheka ekubekweni komntwana uNkulumane ukuba yinkosi?
Angithi kwathi ngemva kokuba inyanga yakoGasa uSithole esezivumbululile lezimpondo emfuleni uTshangane amadoda ayefuna ukumudla engamsuthi uLukukusi.
Kwakunjalo-ke endulo, abathakathi babengafuneki ngoba beqothula isizwe samaNtungwa.
Lokhu kuyisifundo esikhulu sokuthi ubukhunkuli buvele buyinto embi njalo babungavunyelwa lakudala. Baqinisile abadala nxa bethi okukhulu akulamkhosi. Kade sizizwa izinto kodwa okwalezinsuku kukhulu kungangoTshaka qiniso.
Kangikhulumi ngendoda engutsikamutanda ongumfundisi welinye ibandla eNsuza esiziveze ukuthi ingumkhunkuli ngoba yabulala umntwana wesinye isakhamuzi sakuleyo ndawo ilamanye amanina. Angithi indoda le khathesi isiyobayoba ithi umntwana lo useyihlupha asazi ukuthi sokwenzenjani.
Indaba le khathesi angithi sigcwele isigaba sonke lesi ngoba iyethusa phela kodwa abantu kabatholi isifundo lapha ngoba uzezwa sokuthiwa kulomunye njalo oseyenze esinye isiga kungakedluli isikhathi esincane nje.
Okumangalisayo yikuthi kulezinsuku ubukhunkuli lobu sokungani ngumdlalo kumbe umsebenzi. Ngitsho ngoba abanye abantu sebezikhulumela ukuthi bayathakatha okuyinto eyayizila endulo. Asazi ukuthi bawathatha ngaphi amandla kanye lesibindi sokwenza lokhu.
Khona nje asazi ukuthi kungani abantu bengafundi isifundo ngoba phela banengi abantu abaphetha sebekhala ezimathonsi sebehlutshwa yizinanakazana zabo abayabe bezifuyile ngenxa yobukhunkuli. Abanye baze bacele usizo emphakathini sebeveza ububi babo emsakazweni ngoba sebehlupheke kakhulu.
Ngenxa yezigigaba lezi esezisenzakala kulezinsuku akuthandabuzeki ukuthi sokuzinsuku zokucina ezikhulunywa lugwalo olungcwele. Injalo impilo, ungabona umfumfu ununkula, intakubomvu zithela lamangabuzane endiza kawuthandabuzi ukuthi ihlobo lisondele, uyathwasa umnyaka.
BakaMalandela into embi kayaze yaguquka yabanhle noma kutheni. Ngalokhu kuqakathekile ukuthi siguqule izenzo zethu sakhe isizwe sethu ngokuthula langobuqotho.
