uMthunywa
UKUZITHIBA imizwa kubalulekile kakhulu ukuze singaze saba senkingeni ngezinto ezilakho ukucina zisichithela imizi yethu.
Kukanengi amanina ehlangana edolobheni labomkabo bezitika lamanye amanina okuyinto edanisayo kakhulu ngoba kukhomba ukungathembeki lokungazibambi lokuhawukela okungapheliyo.
Esikhathini esinje amanina nxa sethe akuthola lokhu avuka olunye ubhova akhohlwe ukuthi asemphakathini abhaxabule omakhwapheni kuze kudabuke izidwaba, wena nxa unguwe okhandwe usenza lokho kambe sibili uzwa njani nxa amanina sebhuqana emphakathini kubangwa wena?
Impilo enje ibambi kakhulu ngoba kuba yikuqala kokubona udubo; abantwana bathwale nzima ngoba umuzi ungachitheka omunye uqonda le omunye laye aye le, abantwana-ke bona bazaphathwa kuhle ngubani abazali besilwa?
Amanye amadoda asuka ezindlini zawo ayehlala labomakhwapheni, lokhu kuyakungephule umoya ukuthi kanti umakhwapheni lo uyabe sekunike luphi uluju olunjani ongalutholi kumkakho.
Akekho ongasukuma ame laphaya aphakamise isandla athi mina akula engingakwaziyo ngoba phela wonke umuntu kukhona angakwaziyo. Lapha mahlabezulu ngithi nxa ubona ukuthi omunye wakho kakwenzeli kuhle mtshele ukuthi kantshintshe ngaphi ukuze kuqonde, hatshi ukubaleka ekhaya.
Phela omakhwapheni bayakuphatha njengeqanda wena ulixhegu elilenkalakatha yemuli esenzela ukuthi ungamtshiyi ngoba efuna inotho yakho. Bakwethu asikhangeleni izinto ezifana lalezi ngoba yizo kwesinye isikhathi ezibangela ukuthi kungabi lokuthula phakathi kwethu kucine kuchitheka imizi.
Abantu kumele bazi ukuthi uthando lukhula ngokwazana, nxa umuntu ezatshiya inina lakhe elanda umakhwapheni ethi ulithanda ukwedlula umama ombelethele abantwana uyazikhohlisa ngoba iqiniso elikhona yikuba umakhwapheni kamazi, wazi imali yakhe.
Nxa kulenkinga emzini wakho ekwehlulayo ukuthi uyilungise biza abadala kumbe abanye abantu obathembayo ukuthi balihlalise phansi likhulumisane ngenkinga yenu.
Kodwa abanye bengabona kubehlula ukuthi bakhulumisane babona kungcono ukuthi bahlale insuku bengakhulumisani kodwa belala ndawonye. Lokhu yikho okusuka kube ngumaqhuzu ekuthumeleni omunye ukuthi ayewotha umlilo wangaphandle.
Ngaze lixabane njani akutsho ukuthi imizwa layo iyaphela yikho kubalulekile ukuthi likhulumisane ukuze liphange liqondisane ngoba indlala yomzimba iyingozi ngoba abanye iyabakhulela baze babone kungcono ukuyadinga omakhwapheni kanye lamadlecatsha.
Abanye bayakwenza lokhu bahambe bacine bengaphendukanga ekhaya ngoba ukudla okudla usendlaleni yikho okukholisa kakhulu ucine uphinda umphehlo.
Mahlabezulu asenzeni sinanzelela ukuthi asizingenisi enkingeni ngoba nxa sichithekelwa yimizi akubulali impilo zethu kuphela kodwa khangela lezabantwabethu abangelamacala abafuna uthando lukababa lomama lundawonye.Ne nullignis sum et
