uMthunywa
Cornelius Luphahla
ISIGABA lesigaba somnyaka angithi nje siza sibelethe ezaso izindaba ezijabulisayo kanye lezibuhlungu. Intwasa le esifikile layo iphethe ezayo inhlungu zokutshisa okuyizo ontanga ikakhulu amantombazana abasuka bacatshe ngazo bahambe ze bethi ngoba kuyatshisa bona besenga ezimithiyo.
Kunjalo bakaMalandela, inengi labontanga ikakhulu emadolobheni lisuka libuswe yikungondleki lihle lizihambele nqunu uthi nxa umbuza uzwe ethi kuyatshisa. Asazi kumbe imfumba yokuhamba nqunu yikho ukutshisa lokhu abakhuluma ngakho? Kodwa kukhanya vele bayabe bezifunela ukuhamba nqunu kuphela nje.
Uthola intombazana izigqokele ubukudele isiketi esithiwa yisikhavangozi. Umuntu wakhona lokukhothama kakhothami funa abantu babambe oluphuphumayo sokuvele okunye. Lapho ke nxa egqoke inhlamba le uthola lamajaha akhona sebhuza bakithi eqhugezela eceleni kwakhe sokunzima. Ethi nxa ebona lokho umntanabantu azitshile, awajike amahlalo ethi nxa esiyalala ntambama iqolo lingasavumi ngoba lingajwayelanga ukutshilwatshilwa.
Into esuka ingidide yikuthi intombazana iyagqoka isiketi esifitshane okwesabekayo ngapho igqoke isikipa esilemikhono emide okusuka kumangalise ukuthi kambe ukutshisa lokhu kuzwakala emathangeni kumbe kutshisa ndawo zonke nje? Kunjalo phela abantu basuka bavale ngokutshisa besenzela ukuzihambela nqunu nje.
Kwesinye isikhathi uthola inkalakatha yenina lalo ligqoke eyinye inhlamba esabekayo engeyokucina yakhona.
Lenzenje lizihambela esitalaladeni kungabi ndaba zalutho. Pho umuntu onjalo engamkhuza njani umtanakhe nxa sehamba ze emphakathini? Angithi udiwo lufuza imbiza hatshi umcephe? Yikho phela labantwana sebehamba nqunu ngoba bakufunda khonapho njengoba inyathi ibuzwa kwabaphambili. Kunjalo bakaMalandela, inkunzi emnyama iyona amathole sibili.
Abanye babethi ukugqoka impahla ezivala ingozi yodwa kuphela akutsho ukuthi intombi kayiziphathanga. Yebo kambe vele kakho ovumayo ukuthi lisela nxa engakabanjwa kodwa angithi ungabona umfumfu lomphaphama kununkula, intakubomvu zithela lamangabuzane endiza ngeke uthandabuze ukuthi ihlobo lisondele uyathwasa umnyaka. Kunjalo ke lentombi ebukisa amathanga ayo wonke emphakathini ngeke uthandabuze ukuthi ingumthengisi walawo mathanga yikho ewabukisa kuzulu ukuthi athatheke phela.
Lapha kangitsho ukuthi mantombazana ligqoke impahla ezicina enqagaleni kodwa lani nxa ligqokile kumele uthi uhamba uzizwe ulesithunzi. Akuthi nxa udlula emajaheni amane awabuke amathanga akho ngoba bewabona kalumfimfana nje bezwe beginya bugwili ulandelwe ngolesibindi kuphela. Lapho ke lawe uyabe uzizwa sibili ukuthi ulesithunzi kodwa nxa uzihambela ze uzabona ngokuthi lapha odlula khona uzwe ngokhwelo lokubiza umangoye kuthi abanye bazisunduzele kuwe besenzela ukuthinta amahlalo lamathanga la asegcekeni.
Lokhu kuyabe kuchaza ukuthi awula sithunzi ngenxa yokugqoka kwakho ngoba wonke amajaha ayabe efuna ukudanela kuwe. Kuyabe sokufana lomuntu othole abathaphi sebeluqedile uluju lwabo wasedanela emakubeni asalele ebhalwini. Kambe intombi enjalo ingehlukaniswa njani lamakuba? Njengoba amakuba equmbisa kutsho ukuthi amantombazana agqoka njalo akukho okuhle ngabo.
Esikhathini esinengi amantombazana la athanda ukuziphatha ngendlela engagudulekanga kuvame ukuthi ingathola ijaha lihlalahlale layo okwesikhatshana liyikhafule ngoba lisazi ukuthi belingayithandi belizifunela okwalo kuphela.
Vulani amehlo ke mantombazana lizigqokise ngendlela eqoqekileyo ngoba ubunqunu abulanzuzo.
Ungathinta umlobi kuwhatsapp kumbe ufone kunombolo lezi: 0737771317, 0775722298.
