uMthunywa
IMFA yinto engajwayelekiyo njalo itshiya izihlobo labangane bedabukile emoyeni, njalo iyahlonitshwa nxa uhamba hamba unyathela ngonyawo olulesizotha uthole abantu bezihudula angani balezafesani lalapho behleka kuhlekelwa phansi phela kusesatshwa ukuthi kuzathiwa imfa iyakujabulisa.
Bakhona asebelomkhuba omubi nxa kuthe kwehla ifu elimnyama uzwa sebesithi kanje wayeqedile ukulobola, bafunge batshaye phansi ngedolo bethi ngeke bangcwabe umufi nxa kungakhitshwanga yona leyo mali abayabe beyifuna, umdeni wakomkhwenyana ube matasatasa sokudingwa imali ukuze kungcwatshwe, phela ngubani ongavuma ukuhlala lesidumbu endlini abanye njalo ngabakhwitshiza ukuthi isihlobo sabo sigula sasingaphathwa kuhle uthole imideni yomibili isivukelene ukeketani, bathobelane njengeqhude lengalukhuni lizibona esibukweni.
Yikuhluluza isidumbu ngcwabani umuntu libe selihla phansi likhulumisane lihlawulisane, hatshi ukuthi isidumbu sise motsha libe lokhe lidlala umacatshelana, phela banengi abayabe bedabukile emoyeni ikakhulu abantwana labazali kufana lokuzama ukucitsha umlilo ngephethulo.
Bandla singathathi imikhuba esingayaziyo esikhipha ubuntu ayixanxathwe ngemva komngcwabo.
Lezinsuku ungafunga ugomele ukuthi labo abafelwa ngumntwana wesifazana beqa baphose bathinte amayezi ngoba phela ngaleso sikhathi bakhuluma bephakamise izifuba ukuthi bafunani kumkhwenyana labangakibo bakwenze ngokucwayiza kweso ngoba bengafisi ukuqeda insuku ezinengi abantu belokhu bebuthene kulindwe umncwabo.
Isihlobo sonke esiyabe silapho sihle sizikhwathaze imali yenkomo iphume isiwa kibo kukamalukazana.
Asazi kumbe yiso isimanje phela kithi kwakungekho lokho kodwa ngokuxubana kwezizwe sokusenziwa mchilo nje kungabi ndaba zamuntu.
Ayixabene.
Umlobi ungamthinta ku: 0714355641
