uMthunywa
Wawuzwe esikhathini esinengi umuntu egiya ngokuthi yena angaze adale cala bani, ngeke umthetho umenze lutho ngoba esenelisa ukudinga abameli abasezingeni eliphezulu.
Lowomuntu uyaziqhenya ngokwenelisa ukudinga abameli abavela emazweni angaphandle, phela kuhle kucace ukuthi lawo macala adalwa ngokunganaki kuthenjwe yona impande yesono.
Abantu basuke bakhohlwe ukuthi kulento ethiwa ngolimi lwabondlebe zikhanyilanga yi-natural justice.
Ngikhumbula enye indoda eyayisihluphile itshontsha izifuyo zabantu, wayethi loba engabotshwa umbone ngakusisa esephunga uhololo emzini wakhe.
Wayegiya aklamase okwenkonyane eselize liphinda umphehlo unina walo unhlamvukazi elele esidla ikhaba likamakhelwane. Eqinisweni unembeza wakhe wayehlezi embalisela ukuthi into ayenzayo ukweba izifuyo zabantu kayilunganga. Wayekwazi mhlophe ukuthi into ayenzayo iphikisana lomunye wemithetho elitshumi ebhalwe kwacaca ukuthi ungatshontshi ngoba angikaze ngimbone oseke waphikisana lelizwi likaMvelinqangi onothe kokuphela, kuyafika lapho okugudluka khona uthole umuntu esetshaya inja ngekhanda, labafundisi bangangifakazela.
Ngiyangizibuze ukuthi kambe nxa umuntu esenkantolo elonda njalo ezichazela ubufakazi bakhe ekhuluma into ayaziyo mhlophe ukuthi uyenzile kumbe kayenzanga sekungaze kufune ukuthi uzokhulunyelwa ngomunye umuntu ebumba amaqhinga amanga, umuntu aphenduke ingane yona evuma ukufakwa amazwi emlonyeni.
Asikhumbuleni ukuthi ungaze uwadinge amagqwetha abiza inkalakatha zemali usinde kumilandu yakho kodwa ukhona umahluli omkhulu kulabo bonke onguNkulunkulu uyokuthonisa akugwebe kungela kuthi ulamagqwetha abiza imali etshisiweyo.
Kwesinye isikhathi imali zakho obhadala abameli usinde emacaleni owenzileyo uyathi usuwedwa ulele akuthonisise unembeza wakho udle amathambo engqondo okujulileyo uze uhlaselwe ngumkhuhlane wenhliziyo, ube usuhlala ungumuntu wabodokotela lamaphilisi, ufice ukuthi labo owabonelayo uthembe lawo magqwetha akho beziphilela impilo emnandi engela mkhuhlane phakathi.
Amagqwetha mhlawumbe ungawadinga nxa umuntu ekwethesa icala ongalaziyo kodwa ungananzelela uzafumanisa ukuthi inengi labantu abadinga amagqwetha amacala abo bayabe bewazi befuna nje ukuvika lokuthi isigwebo sibe nganeno. Mela indaba zakho utshiyane lamagqwetha ngoba uyabe suyeqe umyalezo kaMdali.
Ayixabene
