uMthunywa
Cornelius Luphahla
MTHWAKAZI omuhle ondlela zimhlophe kule iviki inkundla kazulu iphethe ezokwakha imizi. Angithi nje iBhayibhili elingcwele lithi indoda yinhloko yomuzi. Ngalokhu kubalulekile ukuthi amadoda akwazi ukuphilisana kuhle labomkabo.
Phela manengi amadoda acina ukutshela omkabo amazwi amnandi ngesikhathi besasengamajaha, kuhle kube sobala ukuthi indoda enjalo kayilaso isiphatho esihle njalo ngaleso sikhathi isakwenza lokhu yayisenga ezimithiyo.
Bobaba nxa uhlezi lomkakho kuqakathekile ukuthi umtshele amazwi amnandi umbalisele ngothando olusenhliziyweni yakho aze akhumbule ngensuku esaseyintombi. Ukumjabulisa lokhu kwenza uthando lwenu luhlale luvutha kuthi lamhla lithe laphambanisana lixolelane masinyane.
Kukhona amadoda athi angavela emsebenzini afike adle angene engutsheni alale obukaBhuka kuze kuse. Indoda enjalo yenza lokhu ikhohlwe lokuthi ithethe, isiphatha umkayo njengodadewabo. Pho kuyabe kusaseyindoda bani le njalo? Angithi yikho lokhu okudala ukuthi owesifazana aphume phandle.
Madoda akuthi nxa usubona ukuthi iqolo alisavumi ukhulumisane lomkakho njalo umtshengise uthando ukuze lincedisane ukulungisa indaba yenu. Okunye njalo akuthi nxa uyindoda usuthe wajumeka ungananzeleli ukuthi umkakho usakufuna ungamuzwa esekunyikinya uvuke akubikele isikhalazo sakhe lawe uzame njengendoda.
Okuqakathekileyo ezindlini luthando kanye lokuvumelana lowakwakho umbalisele okukukhathazayo. Kukhona amanye amadoda asuka aphumele ngaphandle ngendlela ezicebelayo. Umuntu wakhona engaphuma njalo uthi nxa efika ntambama afikele ukulala khonapho engakaze akwenze.
Nxa uyindoda usazi ukuthi kawenelisi ukuphatha imizi emibili kungcono uhle wekele ukuphumela ngaphandle ngoba umkakho uzakunanzelela usufika udiniwe nsukuzonke. Yikho-ke ukuzithengisa okwenziwa ngabesilisa abanengi. Kuqakathekile bakaMalandela ukuthi likwazi ukuthi umkakho akafani lomabonakude wasekamelweni osebenza ukubukwa kuphela zwi.
Amanye amadoda adiliza imizi yawo ngokujaha nxa besendlini lomkakhe. Lokhu kuyingozi enkulu njalo yilo uhlupho lwamadoda amanengi. Indoda enjalo kayiziphi isikhathi sokudlalisa umkayo aze ajabule okujulileyo. Umuntu wakhona usuka akhangelele ukuthi akholise yedwa umkakhe asale ekhathazekile.
Akwenziwa njalo madoda, nxa uyindoda woba kwazi ukuthi umkakho ngowakho kawumjahi ngoba kawumtshontshi.
Khona ungavela umtshengise uthando okokuqala uhle ancibilike masinyane ngoba uyabe esejabule ngakho injabulo yomuntu yenza igazi ligijime kalula.
Fundani bakaMthwakazi ikakhulu abesilisa ukuthi imizi yenu liyiphathe ngendlela enambithekayo njalo eyiqinisayo.
Umkakho kahlale ethokozile, umtshele ukuthi uyamthanda ubuye utshengise ngokwenza lokho owamthathela khona.
Sengitshaye kwenela bakwethu sokusalele lina ukuthi liluthaphe loluluju liyelunambitha labomkenu ezindlini.
Kayakhiwe imizi iqine njengasendulo kungabikhona osolayo ezindlini.
