uMthunywa
BAKAMALANDELA ngangithi nxa ngisizwa abadala besithi kudala ilizwe lisakhile ngithi mhlawumbe bayaphosisa ngenxa yokusutha uMagwebu intombi emhlophe kanti cha inyathi ibuzwa kwabaphambili njalo amehlo madala lapha.Lokhu kusobala ukuthi babeqinisile ngoba yonke into yayikhona endulo njalo babesazi ukulondoloza imvelo kanye lamasiko abo. Wawungeke uyithole indawo elugwadula njengalokhu esikubona kulezinsuku othola isigaba sonke sisegcekeni kungelangitsho umthunzi wokucatshela ilanga.
Ekadeni kwakuvele kuzila ukuthi ugamule isihlahla esimanzi njalo babephatha izihlahla njengabantu. Yikho nje baze basungula isaga esithi ihloka liyakhohlwa kodwa isihlahla kasikhohlwa. Babengahlayazi nje lapha kodwa babelenjongo eqotho besenzela ukuthi abantu bengaze baqeda izihlahla ngoba yizo eziphethe impilo zabo.
Ngalesisikhathi lelanga lalingeke lakutshisa kangako ngoba wawuhle uzihlalele ngaphansi kwesihlahla. Kakho njalo owayesifa ngendlala ngoba izihlahla lezi zazithela bakithi kudliwe kudelwe kungela ngitsho ogadela izithelo esihlahleni kodwa kwakudojwa phansi kusesatshwa ukuthi umuntu engephula ugatsha lwalesosihlahla singasatheli izithelo kuhle sicine sisitsha.
Kulezinsuku abantu asazi ukuthi sebangenwa yini bakithi, uthola umuntu esiphethe isihlahla ngehloka simanzi ethi utheza inkuni. Abanye njalo ngabaziwisayo izihlahla lezi bengazi lokuthi bazazisa ngaphi besuke bekhohlwe ukuthi izihlahla lezi yizo eziphethe impilo zabo.
Into esuka idanise yikuthi abanye abantu bathi befuyile emakhaya umthole setshise igusu lonke ethi ukhawulisa inhlanganiso ezikhangela ngokulondolozwa kwemvelo esuke akholwe ukuthi ukhe phansi, uzigwaza ngophuma emvuthweni. Umlilo lo utshisa nje uqothula ngitsho lentanga zotshani lokhu okuyikho okudala ukuthi emnyakeni ozayo bubebulutshwana izifuyo zife ngendlala.
Ekutshiseni lapha ezinye izinyamazana ezincane zihle zitshe zife okubangela ukuthi ezinye izinyamazana zibe zilutshwana kulezinsuku ikakhulu inkakha. BakaMthwakazi kasiguqukeni silondoloze imvelo njengabokhokho bethu ngoba udiwo lufuze imbiza kalwaze lwafuza umganu.
Abaziyo ngezomkhathi bathi indawo ingaba lugwadula njengalezindawo eziyabe zitshisiwe akuvamanga ukuthi izulu line kuhle njalo umhlabathi wakhona uphanga ugugudeke ngenxa yokusweleka kotshani lezihlahla zokuwuvikela.
Lokhu-ke yikho okudala ukuthi indawo ezinjalo zihlaselwe yindlala ebuhlungu.
Ekadeni kwakulamazilo thize ayejonge ukulondoloza imvelo ngakho nxa kusehlula ukuthi sizilondolozele ngeyethu indlela kungcono sikhumbule impilo yaboMandulo ukuze umhlaba wethu ungaze wagugudeka.
Mthwakazi omuhle kuqakathekile ukuthi imuli zethu zakusasa zithole imvelo isahlangene njengathi ngakho singaze sayiqothula kasiyivuselele ukuze isizwe sethu sithuthuke. Lokhu kungahle kuthuthule lamasiko ethu ngoba lawo adinga imvelo epheleleyo ukuze aqhutshwe ngendlela eqotho.
