uMthunywa
Mehleli Dube
AMANZI ezulu angumaphilisa, loba yinyamazana, isihlahla loba abantu. Iganga othola litshile kumhlophe nke, ekuneni kwezulu liguquka libe luhlaza tshoko, uzwe lokuzinyoni kutshaya inkwelo kutshengisa ukujabula lobunandi bempilo.
Abantu labo wawuzwe bethi kogulayo njengoba eseke wanethwa usezasila. Wona amanzi ezulu ayagezisa iganga libe lihle ngoba akhukhula yonke ingcekeza iyejikelwa elwandle kusale kubetha umoya omnandi. Zinengi izingozi eziba khona ngesikhathi sezulu nxa singekela ukuqaphelisisa.
Amanzi ezulu alamandla esabekayo, lenkalakatha yentaba ayayiphakamisa, ayifuqele le. Kwakuthi ngamakhefu abantu sebejahe ukuyabona izihlobo labangane basuke balingeke ukuchapha umfula ugcwele, abathathe amanzi ayebaphosela kude, itshabalale impilo kalula nje.
Abanye ngabathi loba bebona umbane uphazima umuntu aze athathwe yisiyezi aphikelele ukuhamba acine esetshaywe yinkosazana, aphenduke abemnyama tshu, wena osewake wabona umvundla oxatshiweyo ungazi ngcono.
Abanye ngabathanda ukubhukutsha izulu lisina,phela imifula emikhulu nxa igcwele amanzi akhona ayalibazisa ngoba ayabe phezulu ekhanya angani kagijimi kodwa ngaphansi ayabe ehamba ngesiqubu sesavunguzane.Ungalingi ukuchapha umfula ugcwele lapho okungela bholoho khona, linda wetshe ulaka lwamanzi ludede.
Nanto izulu selifikile, asiqapheleni izingozi silime sivuthise.
Ayixabene.
Umlobi uthinteka ku: 0714355641.
