uMthunywa
Mehleli Dube
ISIZWE ngesizwe silenkolelo yaso lamasiko kusehla lebantwini abaphila kuleso sizwe. Ubani lobani lilungelo lakhe elokukholelwa loba yini ethokozisa umoya wakhe angeke aliphucwa ngumuntu.
Abanye ngabakholelwa emadlozini kodwa inengi labantu bakulelilizwe bakholelwa kundodana kaJosefa uJesu Khristu.
Ekuhlaleni ezabelweni senginanzelele into edukuda umoya wami, ngivumele ngithi inkolo eziphambanisa abantu ufice sebephembela kungani lichalaha elithungatha umkhondo webhalabhala elidlule phansi kwesibaya empondo zankomo.
Zinengi izihlobo labangane esezaya kobhekabezayo, ngitsho phela emathunjini womhlaba ngenxa yenkolo ezehlukeneyo. Bakhona njalo abakholelwa emaphurofethini, uthola ukuthi umuntu uyabe elomkhuhlane onjengabotshukela, isifo senhliziyo ngitsho sibi segcikwane lengculazi ehlolwe ngodokotela bathola ukuthi ulawo, kodwa kuze labobaphurofethi bamekelise ukunatha amaphilisi, bathi umkhuhlane wakhe ubangelwa yikuloywa.
Agajiswe aphalaze ahude umuntu wenkosi amalulu aze asale engasela ngitsho lethonsi lamanzi. Ziqanjelwe amanga izalukazi lamakhehla kaMvelingqangi uzwe kuthiwa uloywa ngugogo kumbe ngubabakazi zimbece ngapha bona izifuyo bayabe bethanyela esibayeni athi umuntu esedlule kuswelakale yona inkubalo ngenxa yenkolelo zethu.
Ungizwe kuhle, angitsho ukuthi hlukana lenkolo yakho kodwa xwaya ukuthi ikusaphi njalo ikwenza uphile njani. Ufica kwezinye izikhathi umuntu ogulayo evuswa ngovivi lukaMagadalina esiyabheka uJesu emathuneni njalo kuyabe kungumango mhlawumbe ledamu okuyabe kuthiwe kuyolahlelwa lezozinto okuthiwa ngabaphurofethi yizo ezigulisa umuntu.
Kanengi imideni iyaxabana bafe bengasakhulumisani kulokuthi bagxile emkhuhlaneni ukuze omunye welunga asinde kuyabe sokuqhatshelwe lobobuthakathi. Ye, bungabakhona ubuthakathi kodwa isixwayiso sami sithi esibhedlela akuhanjwe nxa sithe sezwa sokuxega lapha lalaphaya. Into engixakayo yikuthi into ezivame ukukhutshwa ngabaphurofethi zijinge zifanane ungaze uyekusiphi isabelo. Yikho-ke bandla ngisithi asiqineni emaphilisini sehlukane lokugajiswa okuzasiqeda amanzi emzimbeni.
Ayixabene.
Mehleli nkunziyembongolo Dube 0738305027.
