uMthunywa
Mehleli Dube
NGENXA yobunzima lokungami kuhle kwezomnotho welizwe ikhona imigulukudu lamahaga azembesa esemvu bavule amabandla abo ezinkonzo benxwanele ukuqila abalandeli babo.
Wawuzwe kwamanye amabandla kuthiwa umfundisi wakhona kafuni mzalwane onikela ngebhondi, bafuna i- rand kumbe idola laseMelika. Batshaywe ngamakhanda abazalwane bedinga leyomali etholakala nzima ngoba inengi labantu bengayiholi kwelakithi.
Abanye ngabavula amabandla abo kuthi leyunifomu iyabe ithungwa ithengwa kumkaMfundisi, abavunyelwa ukuthi bathenge kwenye indawo lokuthi bazithungele, ngoba betshelwa ukuthi engathungwanga ngumkaMfundisi iyabe ingabusiswanga.
Anothe sakudlala umfundisi weNkosi, kungensuku zatshwala umthole esetshaya ngovava lwemota ebelethe isondo, abanye ngabaze bathenge lendizamtshina ezincane ezithwala umfundisi lemuli yakhe, ngapha abazalwane bebhadula ngezikaEva angani ngumkhonyovu wenkunzi yebhubesi elizingela amazinyane empala ngoMpalakazi ngoba yikho lapho ezizala khona, sibi semali yamafutha emota uyiphiwa yibo akhombe ngophakathi, ufice umkakhe izihlathi sezicazimula eseze waphuma lobilo, ungani ngumntanenduna esidla imali yamacala, ngapha abazalwane bethwele luklubhu ngokusuthisa indingeko zakhe.
Kwamanye amabandla ufice umkaMfundisi eseqhatshe labantu ethengisa iziwiji, ama-frozen lamajigisi, ufice abazalwane bematasatasa bethenga, ngoba befuna ukuthandwa ngumfundisi lomkakhe.
Kulelinye ibandla engilaziyo kugqokwa ezimhlophe kusukela enyaweni kusiya ekhanda, langesikhathi somqando amajesi athengwa kuye, uyabe esevule ifekithali uqobo lwayo. Ufica abazalwane sebekhonza umfundisi balibale ngoMvelingqangi.
Into esuka ikhohlwe ngabazalwane abanengi yikuthi phambi kobuso bukaMdali sonke siyalingana njalo ungazeyisi ngoba uNkulunkulu wakudala ngoba kulendima okumele uyithutshe emhlabeni.
Lobufundisi bakhona abusayelwa emakolitshini, umuntu umane nje avuke engumfundisi angani yinkunzane enethwe yimbolisamahlanga kaNcwabakazi, uzwe eseziqhenya umuntu ethi ngilebandla lami njalo kukhala esami isicathulo, ongafuniyo ukuthobela umthetho wakhe kadliwe ngumswenya.
Ngahleka ngibala kwelinye iphephandaba lasemazweni eWest Africa kuthiwa nxa kusiba lombuthano lamajazi abakhwenyana (condoms) athengiswa nguye umkamfundisi uqobo lwakhe. Lakanye ngayifunda ivaliwe ukuthi lokhu sokulibhizimusi osekusele nje yikuthi abanye bakhona bathengise ugologo, kuhle kube kompunzi idla emini. Kuvamile kubafundisi abasesebatsha ngenxa yokuswelakala kwemisebenzi ukuthi kuhlale phansi okunkunzi kukhande icebo lokwenza imali ngabanye abantu, anothe umuntu uthole sekulibandla lomdeni kuthi loba engadlula emhlabeni indlalifa yakhe iyetshathe intonga zakhona.
Ayixabene.
0714355641.
