uMthunywa
Silo Cornelius Luphahla
LINA bezinyane lesilo ngilethemba lokuthi liyazi ukuba indaba ziyakhulunywa sizilalele sibuye sizithwale sizidlulisele kwabanye kuthi lapho ebamba khona itshiye amanxeba. Kunjalo bakaMalandela, lakule iviki ziyeza njalo indaba eziqukethe ezasendulo ngesikhathi isizwe sisakhile.
Angithi nje oMandulo basungula izaga, izitsho kanye lamanye amazwi ayindida emphakathini ngenhloso yokukhaliphisa uzulu. Lokhu bakwenza ngemva kokuhlolisisa lokunanzelela okuthile. Yikho phela kungathandabuzeki ukuthi babekhaliphile oNdukuzibomvu amajaha omkhonto. Kwakunjalo-ke ngasendulo, abantu besagiya ngoludala.
Ungalibali ukuthi izaga lezi zazisungulwa ngemva kokukhangelwa izenzo zezinyamazana, abantu, kanye lemvelo yonke nje jikelele. Yikho phela okwenza abadala baze bathi goba msenge udliwe zimbuzi.
Phela lesisitsho sikhuluma indaba ndida okusuka kube nzima kwabanye ukuthi bayicazulule. Bakhona abanye abantu ababesaziwa ngobuqili, ubugagu, ubugabazi kanye lezinye inhlobonhlobo zezenzo ezidida umphakathi kodwa nje kwakuthi nxa sebemxhiliba kunyamalale konke lokhu.
Abanye nje babeziqhenye ngobubi babo kumbe ukungaqoqeki kwabo bengazi ukuthi akubonda laguga lamaxolo alo.
Phela amajaha omkhonto ayengasomi mhla ethi kusinwa kudedelwana. Ngakhona lakhathesi sikubona ngamehlo ngoba kwabanye sesimane sithi guga sithebe kade wacholela.
Angithi umsenge lo mhla ugobayo uyabe usugugile nje kuthi imbuzi zizitike ngamahlamvu awo zizelaphe umkhuhlane wenyongo. Kambe uyabe uzakwenzani njengoba uyabe usuphelelwe ngumphako sokufanele udedele abantwana.
Ngokunjalo bakaMthwakazi lapha ngijonge ukuhluba indlubu ekhasini ngichazele uzulu ukuthi kubalulekile ukuthi abadala badedele abantwana ngokubafundisa mayelana lembali kanye lamasiko esizwe ukuze mhla bephenduka umswenya ulwazi lolu lusale lugxilile kubontanga.
Yebo kambe sasizwe amakhehla asesotha womabili ethi kukhona ezinye indaba ezizilayo kodwa akutsho ukuthi lezi ndaba kufanele zingaziwa muntu ngoba mhla amakhehla la edliwa ngumhlaba yiziphi indaba ezizasala zizila emphakathini? Angithi nje kuyabe kufanele ukuthi indaba lezi bazibikele abatsha abambalwa okuyibo abazasala beyibambe esidukwini.
Yebo kambe bakaMalandela sasikhale sithi intsha kayisawathakazeleli amasiko kodwa kayaze yanatha ingawaphiwanga amanzi. Ngokunjalo kusobala ukuthi kubalulekile ukuba limane lixhotshwe libhekile kulokuthi lixhotshwe licimezile ngoba funa kube yikho ukuphela kokubona kwalo.
Ngokunjalo bakaMalandela sokusobala ukuthi okudala ukuthi intsha yakulezinsuku intule leganga yikuthi iswele abelusi ngoba inengi labadala limana ligagadlele indaba zamasiko lingaze layiphakela ngitsho lakhezwana kuthi mhla befayo isizwe sisale siduhile.
Ngalokhu bakwethu ngilethemba lokuthi umphakathi uzayibamba uyigagadlele indaba le ukuze ubuye uyilolonge ngoba intsha yakulezinsuku ikhala ezimathonsi njalo iswele umsizi kwezamasiko.
