uMthunywa
Gladmore Ncube
SELIZABHALA imihloliso yaphakathi komnyaka kukanti abanye vele sebeqalisile ukubhala majaha lezintombi, ngilethemba lokuthi lonke lihlome laphelela ngezikhali zemfundo ukuze ekupheleni lithole umvuzo oqondileyo hatshi ukuhlanyela imbewu yomumbu livune umfaba.
Usizi olukhona yikuthi inengi lenu lihlala liqaphele ukubonana labangane abalikhohlisa ngempilo liphethe livuna imbabazane uqobo engadliwa lazinyamazana. Uthole umntwana sesenwaya kuphume uthuli emzimbeni angathi ngubabhemi esesilotheni, yena wazidingela ngokungaziphathi kwakhe ngethuba kuthiwa ayefunda wakhetha ukuyadinga amajaha.
Yebo kambe zinengi izinto ezifundwayo empilweni kodwa konke kulesikhathi okufundwa ngaso kanye lenjongo yokufundwa kwakho. Lapha ngizama ukulibonisa bantwana besikolo ukuthi lingajahi umdaka izulu lingakani ngoba ungalima ebusika izulu liyathi lisina kumile ndawonye lokhula wehluleke ukuhlakula kudliwe lukhula, ngakho qakathekisani ukufunda amabala hatshi ezothando ngoba isikhathi sezothando asikafiki kini.
Ngikhuluma nje inengi lizasuka lephulele iziqu endlebeni lizenzele umathanda ligijimise ukungahloniphi kanye lezothando kodwa lingazi ukuthi liziholela amanzi ngomsele ngakho isiphetho lizakotha eliwuphembileyo, litshe okamazokhela.
Kulezi insuku uthola umntwana ebhinqilika sacimbi engasabambeki sehamba angathi uyababayila egqoke okuyisiketi okuphelela enhla yamadolo ethandelane lomfana ohamba ekhwenyezela ngapha ibhulugwe lingaphansi kwezihlalo emini libalele bethi bavela esikolo. Asazi ukuthi kuyabe kufundwani lapha kumbe kuyabe kufundwa wona majaha lawo.
Bantwana besikolo, yazini ukuthi isikhathi salokhu siyeza lapho lizabe selikhulile selisazi ububi lobuhle bamajaha kanye lobamantombazana. Khathesi inengi lenu lithi lisajabula lona lintula okwengqukumbane umdlwane ongakathungululi, angathi lingaze liwele egodini.
Ngiyazi inengi lamantombazana lisuka liphathe ababalisi njengentanga yabo uthole umntwana etshona ethe sece kumbalisi engasabambeki. Imini yonke uyabe ecabanga ukuthi kusasa agqoke siphi isiketi esingakhanga umbalisi, asuke akhohlwe ukuthi esikolo ulande ukufunda hatshi umbukiso.
Usizi yikuthi abazali benu bayabe bethi lisesikolo liyafunda kanti lifunda amajaha, lani bafana inengi lenu seladluliswa butshwala. Kambe kwake kwangenelana ngaphi utshwala lemfundo? Angithi nje lombalisi kavunyelwa ukunatha utshwala esikolo. Pho lina lingahlanganisa njani utshwala lemfundo? Fundani amabala bantwana lingathathwa luthuli lwamadube ngoba isiphetho lizayikhotha imbenge ngolimi.
Umbalisi ufana lomzali wakho njalo sowaqeda okwakhe ngakho mhloniphe, nxa sethe wacela uthando kuwe ungathabi, phangisa ubikele umphathisikolo ngoba uyabe efana xathu lenkukhu enatha amaqanda ayo okufanele itshiswe umlomo.
Bontanga, sengiyiphosile induku ebandla ngayitshaya eyami ingquzu ngakho ngithemba lizazikhethela elikufunayo. Nansi inkundla ngilitshiyele kodwa sizayicela sivuthiwe ngemva kokuba selivune elakuhlanyelayo. Kuzaba buhlungu kulabo abangamahlongandlebe.
