uMthunywa
SASIZWE amakhehla asemxhiliba ethi ikhuba lomunye kalilandima kodwa nje abanye basuka bakutshaye indiva lokhu bamane bephulele iziqu endlebeni bakuphathe njengamahlaya nje. Asazi-ke ukuthi kungani beweyisa amazwi abadala angaka?
Noma kunjalo isaga kasaze saguquka kodwa sihlala sinjalo kuze kuyethwasa inyenyelehuwe inkanyezi engabonwayo.
Ngalokhu labo abamana beyise amazwi amakhulu la baphetha bewela esizibeni esingelamkhawulo.
Ngokunjalo lapha bakaMalandela kangijonganga ukucazulula ngodaba lwempahla kumbe okunye kodwa ngijonge ukucacada mayelana lobubi babomakhwapheni kanye lamadla ecatsha. Angithi phela sokungumkhuba osusegazini labantu abanengi kulezinsuku ukuthi indoda iphile ilomakhwapheni ngapho ithethe kumbe umfazi abe ledlalicatsha.
Indaba le kayaze yabukwa noma ngubani ngoba imbi kakhulu. Phela ukuba lidlalicatsha wena uthethwe kufana xathu lokuthi weba imfanelo zabanikazi ngoba umfazi lo uyabe engoweyinye indoda. Labo phela omakhwapheni laba bayabe bekwazi ukuthi indoda ngeyomnikazi asazi ukuthi basuka babuswe yini baze bakhethe ukuzibhacekisa.
Isimanga yikuthi njengoba amadoda emanengi kangaka kungani omakhwapheni laba bengazidingeli awabo munye ngamunye hatshi ukuphila ngokweba. Khona kuyini okungalunga nxa abantu bephila ngokutshontshana?
Ungananzelela ukuthi umakhwapheni lo uyabe eleyinye njalo indoda yomnikazi futhi umsebenzi wakhe yikuhuquluza imali endodeni yomnikazi. Qaphela ukuthi esikhathini esinengi amadoda amanengi ayabe esebenza kodwa uthole ukuthi abantwana babulawa yindlala kanti umakhwapheni uyidla aze ayiqamele imali.
Lani-ke madoda kuhle ukuthi livuse inkophe licubungule kabanzi mayelana laloludaba lwabomakhwapheni lolokuba lidlalicatsha. Nanzelela ukuthi amadoda amanengi ayabe ethethe kodwa umthole esetshotsha enqamekela ikhosikazi leyinye indoda asazi ukuthi uyabe esebuswa yini.
Yikho phela okudala ukuthi uzwe sokuthiwa indoda ibulewe emzini wenye indoda ngoba eyithole ilomkakhe.
Ngokunjalo kuhle kuzivezele sobala ukuthi into yomuntu ngumhluzi wempisi. Ngalokhu kuhle ukuthi nxa uyindoda usuthiseke ngekhosikazi lakho olithetheyo kuthi nxa ungumfazi lakho usuthiseke ngendoda olayo.
Yebo kambe bakwethu zikhona ezibuhlungu ezindlini kodwa abadala babethi kayaze yathi ngokukhaba isiganu ihle ibulawe. Ngalokhu kuhle ukuthi zihlabane zibuye zikhone. Lokhu ngeke sikwenqabele vele ngoba akulamuzi ongathunqi ntuthu.
Mthwakazi kaNdaba kubalulekile ukuthi sisuthiseke ngalokho esilakho njengoba leBhayibhili elingcwele liyakuveza ukuthi ungahawukeli indlu kamakhelwane wakho. Kambe nxa lisitsho njalo pho thina sikuphikiselani lokhu njengoba siphila ngaphansi kwalo umhlaba?
Esikhathini esinengi udaba lokuba labomakhwapheni yilo oluletha izibi endlini ngoba lokhu kuvele kuyinto embi.
Kunjalo-ke bakwethu, kasibambeleleni kukho esilakho sidele ezabanikazi ngoba zingasidlisa ezilamatshe kanye lokubabayo.
