uMthunywa
Ake ngithi bonke abantwana ababhala imihloliso yokuphela komnyaka, ngilifisela inhlanhla yamaSwazi elakufundiswa ngotitshala benu likuntshantshaze njengoba kunjalo ukuze liphumelele ngoba imfundo yilifa elingapheliyo njalo elingakotshelwa muntu.
Angeke empilweni uthi umzali wami wayefundile angadlula emhlabeni ngizasala ngithatha isicoco sakhe semfundo sobudokotela. Ngomnyaka ophelileyo abangazange baphume kuhle emihlolisweni kwathiwa imbangela enkulu yiCovid sakuzwisisa ngoba bekufundwa amalombolombo.
Imhloliso
Lonyaka kuzanyiwe ukufundwa lamakhefu abazali bekhipha lalokhu okuthiwa ngolimi lwabondlebe zikhanyilanga (incentive) kuzanywa ukuthi ababalisi babe lomfutho logqugquzelo olungaphezulu ukuze bafundise okwamagama.
Bakhona abangakhala ngokuthi isikhathi sibe sifitshane kodwa nxa sihlanganisa izifundo zekhefu lalezo ezafundwa izikolo zivuliwe kumele impumela ibe sezingeni eliphezulu kwehlule kulabo abakade bezimpumputhe.
Phela ukuphumelela kwabantwana kwenza lesikolo sizigqaje ngabafundi baso uzwe lomphathisikolo esesithi kungenxa yobukhokheli bakhe obuhle obenze abantwana baphumelela loba ekade etshona ephuza uhololo ehofisini lakhe ethonisa amacala esinyeyo njengabomalukazana besithenjini.
Lonyaka sifuna ukuzwa ukuthi bazakhala ngani. Ayixabene.
