uMthunywa
Cornelius Luphahla
BAKITHI kule iviki kukhanya imbilaphi isola isilonda njengoba nje babengasomi abadala nxa bethi inja kayaze yakhonkotha iphethe ithambo. Ngitsho ngoba kukhanya kukhulu okudala impi phakathi kwabomalukazana laboninazala.
Kuvamile ukuthi umalukazana engazwisisani loninazala okuyikho okudala ukuthi athuthe ayehlala lomkakhe kweyinye indawo batshiye uninazala ehlupheka yedwa. Kambe impi le ingabe idalwa yini Mthwakazi omuhle? Kakho okuqedisisayo lokhu, yimpicabadala uqobo.
Yebo kambe kungaba yimpicabadala kodwa okunye okudala impi le yikuthi inengi labomama liyabe lifuna ukuthi abantwabalo bethathe omalukazana ababafunayo. Kwakuthi nxa ijaha selithethe intombi engathandwa ngunina kube yimpi enkulu phakathi kukamalukazana lo loninazala. Lokhu kuyabe kusenziwa ngumamazala ngoba uyabe ehlala ethethisa umalukazana emchothoza kwezokupheka, ekondleni abantwana, ekuphilisaneni kwakhe labakwabozala kanye lakwezinye indawo ezehlukeneyo ethi kakwazi ukukwenza ngendlela eqondileyo.
Abanye omama baxabana labomalukazana babo ngoba bayabe bengafuni ukuthi abantwababo bathathe ngenxa yokuthi bafuna ukuthi kube yibo abemukela impahla ezivela emntwaneni olijaha. Angithi nxa ijaha selithethe impahla zonke ziyabe sezifikela kumalukazana unina sephiwa ngumalukazana lakho nxa ethanda. Yikho-ke okuvame ukulumathisa umlilo phakathi kwalababantu.
Uthola umamazala sesithi ukudla lokho kuthengwa ngumntanakhe njalo wazifundisela ngakho ngeke avume ukuba impahla azithengayo zifikele komunye umuntu. Umalukazana laye ale ngokuthi impahla zithengwa ngumkakhe ngakho ngeke atshayelwa umthetho kulezo mpahla. Lapho-ke kubanzima kwesinye isikhathi kuphetha kubanjanwa langezandla sibili. Yikho okunye okudala ukuthi uzwe kuthiwa umama uthakathe umntanakhe esenzela ukuthi engathathi ukuze akhangele yena kuphela.
Mthwakazi kaNdaba angithi nje ikhanda elilamehlo liyazibonela njalo kayikhonyelwa kungasinkunzi yomdaka. Pho nxa umamazala eyathi kamfuni umalukazana kuyabe kutheni? Yikho-ke okucina kusenza abantwana abangabafana babalekele onina uzwe kuthiwa abafana kabagcini abazali babo kanti abazali yibo abaqali bendaba.
Esikhathini esinengi umalukazana othandwa nguninazala ngovuma konke okufunwa nguninazala noma kukubi. Yebo kambe akutsho ukuthi umalukazana kufanele engalaleli amazwi kaninazala kodwa kuqakathekile ukuthi uninazala laye amhloniphe njalo avume ukuthi babonisane lomalukazana ukuze bahlale ngokuthula.
Omalukazana labo bandise ukukhathaza ngokuthi bengathola imuli ibambene bafike bayichithe besenzela ukuthi omkabo basuke bayehlala labo khatshana labakwabozala. Kuyinto embi-ke lokhu ngoba endulo besisazi ukuthi umalukazana emendweni ulande ukuhlanganisa imuli kanye lokuyandisa. Kwakuthi nxa ethole umdeni ubambene ahlale aze akhe owakhe umuzi atshiye ulokhe unjalo. Manje inengi labomalukazana bakhathesi ngozibhincamakhasana baba, abazithuthi nje indaba zakwabozala baze basenge lezimithiyo.
Mthwakazi omuhle kuqakathekile ukuthi sihlale ngokuthula lokubambana emulini kuthi nxa umalukazana ephambanisane loninazala bakhumisane umlotha. Omama labo kufanele babonisane kuhle labantwababo kusasemasinya ngoba amathole akhethwa kusakhanya, bengathi nxa umtwana sethethe bethi umalukazana kabamfuni.
