uMthunywa
EKADENI kwakuthi noma kukhwamalele kanjani kodwa abantu lezifuyo babengasweli amanzi. Ukuswelakala kwamanzi kwakungaba ngomunye umhlola ongeke wakhulunywa muntu ngoba uqeda amathe. Kulezinsuku abantu sebelamba baze baswele lamanzi okunatha.
Angithi nje edolobheni lakoBulawayo lapha abantu bakhala ezimathonsi ngenxa yokuswela amanzi. Abanye sebeze bephila ngamanzi ezifula zengcekeza ngoba kungela enye indawo abangayaphephela khona.
Njengoba kuqhubeka kukhwamalala kangaka kutsho ukuthi nxa uMvelinqangi engasangenelanga waletha amazolo abantu bazalutheza olulenkume sibili. Angithi nje lezifula zengcekeza lezi zizaphela amanzi njengoba seziqalile nje ukutsha. Pho bazawakha ngaphi-ke amanzi nxa seziphelile izifula lezi?
Kwezinye indawo ezifana lakubo Cowdray Park imigodi le eyayigejwa yikhansili kayikho yikho nje izizalwane zakule indawo zikhala ezimathonsi ngamanzi. Uthola abantu beludwendwe bethwele izigubhu besiyafolela amanzi kwamanye amalokitshi anjengeMakhandeni leLuveve.
Benzenje bazahlala imini yonke bewalindele baze bayesuka selithe qobhi kunina. Lokhu kusuka kube yingozi ngoba kungenzakala ukuthi izigebengu zibacathamele endleleni ebusuku zibabhinye njengoba behamba egangeni njalo inengi labo kungabesifazana. Kambe abantu bengenzani njengoba bayabe befuna amanzi?
Okusuka kuzwise ubuhlungu njalo yikuthi ukuswelakala kwamanzi lokhu sokudale ukwanda kwengcekeza kulelidolobho. Abantu basuka bayezisiza egangeni njengoba kuyabe kungelamanzi endlini. Njengoba nje leganga leli livele lingatholakali eduze angithi yikho okudala ukuthi umuntu engaphatheka ebusuku ahle aqotshame eduzane nje azisize kungabi ndabazalutho.
Lokhu kungavela kwenziwe ebusuku kuthi nxa kusisa kube sokusesabeka indawana yonke bakithi. Angithi ingcekeza le yiyo indlela yokumemetheka kwemikhuhlane ethile efana le-cholera kanye leminye nje imikhuhlane ethile.
Angithi vele emadolobheni yonke into idinga amanzi nje? Pho abantu bengaphila njani bengelawo bakwethu?
Izambuzi zisebenza ngamanzi, ukuwatsha, ukugeza, ukupheka kanye lokunatha. Okunye yikho nje abantu uthola kuthiwa seqalekile enzikini yedolobho angithi yikho ukungagezi lokhu njengoba kungelamanzi kubuye kutshise kangaka. Kambe umuntu engaphila njani phakathi kwendubo zonke lezi ezingaka?
Kulezinsuku abazihlalela emakhaya bangcono kakhulu ngoba ngeke banatha amanzi ezifula zengcekeza. Imithombo yabo abayigebhayo ilamanzi ahlanzekileyo nanko phela bayigebha emifuleni hatshi ezifudlaleni zengcekeza lezi.
Lapha sokudingeka ukuthi ikhansili yakoBulawayo izame amanye amacebo okusiza uzulu ngoba kukhanya imbiza sihuba sakutsha sibili nxa kungaphela inyanga kunje sokungavela ingozi. Njengoba kuthiwa impi ivinjwa isasekude kuhle ukuthi udubo lwamanzi lolu lukhangelwe kusasenje.
Ungaxhumana lomlobi ku 0775722298 kumbe uthumele iWhatsApp ku 0737771317.
