uMthunywa
YiNtatheli kaMthunywa
EMHLABENI wonke jikelele bathi obaba ngosomangase abamangalisayo into yabo yonke ngeyamanga okuthiwa yi-fake ngesiLungu. Bathi ubaba lempilo ayiphilayo igcwele amanga lobugwala kanye lobumenemene. Bathi okunye okwenza imitshado ichitheke yikuthi omama izinto abazithenjiswa bezintombi bathi nxa sebesemitshadweni kube sengathi balahlekile.
Uthi lanxa ujaha ebona intombi ayiqonde egqoke ibhulugwe lokweboleka kanye le perfume konke kuyabe kwebolekiwe. Abanye baze beboleke lezimota umuntu ahambe elengise amakhiye emota ethwele lefoni angayaziyo lokuthi isetshenziswa njani.
Odade labo phela ngoThathekile imota yamanasika kukanti bangoSithembile into yonke abayitshelwayo umuntu uhle azibone esesemzini wakhe elomkakhe lezimota ababone labantwana sebegade imota ka daddy kanti liphupho khona ezaphaphama.
Bathi njalo lanxa izinto zizimbi ziminya obaba kabakwazi ukuthi bakhulume ukuthi lapha izinto ziminyile.
Bamane bathule bathi konke kulungile uzezwa sekuthiwa uzibophele kumbe ugwaze umfazi laye wazibulala.
Kulezinsuku kukhuthazwa ukuthi abantu baboyahlolwa umkhuhlane wengculazi sikhathi sonke. Nxa ungumama ufuna ukuzidingela impama yomkakho akumtshele ukuthi ayehlolwa esibhedlela ukuthi upositive kumbe unegative. Uzezwa ekubuza ukuthi uboneni okusolayo njalo nxa wena mama unegative kutsho ukuthi laye u negative ngakho tshiyana laye.
Abanye babhuqa omama too good bathi kutsho ukuthi umama kukhona akucabangela ubaba. Lokufelwa ungakhangela esikhathini esinengi omama nxa befelwe baba lezibindi kodwa ubaba uhle abe yimbuzi umbone ukuthi kasazi lokuthi aqalisele ngaphi. Kodwa benjalo lapha abahwabha khona lalapha abatshinga khona uyathi yindoda uqobo isilwane kanti hatshi akulanto enjalo.
Lengwalo zomhlaba wonke jikelele zikhomba ukuthi abantu abathatha impilo zabo kakhulu ngobaba ukwedlula omama. Ubaba uyenelisa ukuzibophela ngenxa yokuthi, uqanjelwe amanga, uphelelwe ngumsebenzi, uthathelwe umfazi, wenze icala elikhulu lezinye indaba ezigudlana kubi lempilo zabantu. Yikho bathi impilo kababa igcwele amanga wodwa ayakuthi kusasa esesithi puntshu kube nzima ukuwamela. Omunye wathi yena lokungathembeki ezimulini abanye obaba bazibambisa ngamanga abo sengathi ngabantwana abancane.
Bathi umama wathi engalalanga endlini indoda yabhovuka yambuza ukuthi ulele ngaphi wathi ulele emnganini wakhe. Ithe ibuza ukuthi wuphi umama wazithulela. Indoda yafonela abangane bakhe abalitshumi bonke balandula ukuthi ulele kubo. Omama bazikhulumela iqiniso elibakhululayo. Besekusithi ngakwelinye icele ubaba walala engabuya kuthe umfazi esidla amahabula indoda yathi ilele kumngane wayo ngokufanayo umama wafonela abangane bomkakhe abalitshumi kwathi abangu-8 bonke bathi ulele kubo liqiniso leli. Kwathi abababili bathi, “Ulele kimi ngilaye lapha usalele mina yikuthi ngiphandle.”
Lokhu kukhomba ukuthi amadoda wonke alitshumi ayeqamba amanga esenzela ukuthi asize omkabo kanti yikhona bebasela umlilo. Nampo njalo sebeqalisa ukufonela ubaba lo ukuze bamtshele ukuthi umfazi uyamdinga njalo ufike sikhathi bani. Umama wabaphendula bonke wabafonela wabatshela lokuthi umkakhe ulaye baswela lokuthi baxolise njani emangeni anje. Yikho ubaba esenelisa lokuzipha isibindi sokutshiya umkakhe olabantwana ababili ayedonsana lesalukazi esawa enqoleni esilabantwana abayisikhombisa anyamalale ahlale labantwana laba asebenze aginqe asebenzele konke ufice engudaddy abafundise abendise belaboyise esazi mgceke kodwa ezipha isibindinyana samanga.
Ufunga agomele phambi kwesalukazi athi yena impilo yakhe yonke uzinikele kaphindi abuyele kumkakhe. Nxa esegula umgogodla usucijile yikho lapha acabanga khona imuli yakhe yeqiniso. Abantu bathi abafazi badlisa amadoda akulanto enje indoda ingathatheka ifana lomntwana osecrèche okhalela ukuhamba lomalume ngoba emuphe isiwiji. Ngibona sengathi yimi ngedwa ubaba olesibindi mpela ofana lebhubesi otherwise the rest ngamagwala.
