uMthunywa
Cornelius Luphahla
BAKWETHU kade ngiyiziba lendaba yamaPositoli ngithi mhlawumbe bafana ledlundlwana elingakakhuli kanti qha bakaMthwakazi imfene kayisilahli isiphongo sayo njalo amanzi kawalweqi udonga. Ngakho ke namhlanje kangisoze ngitshaye inja ngifihla uphini kodwa ngizagadla ngomdikadika langewisa ngiqothule imbokodo lesisekelo. Ngitsho nje ngendaba yabo yokuhlaba amagama abantu ngamanalithi kanye lokuphosela amalembu emadamu okusuka kudanise ukuthi kungabe kuhlolani.
Angithi nje umuntu okuthiwa ngumthakathi akusuye ovuka ebusuku kuphela zwi? Pho laba abahlaba amagama abantu emagangeni ngamanalithi kuthiwa banjani? Akusibuthakathi nje lobu? Asazi bakwethu kwazi uMvelinqangi yedwa zwi. Noma nje kusazi yena yedwa kodwa into embi vele imbi ngakho ukuhlaba kwabo amagama abantu ngamanalithi kubi sibili.
Okunye njalo okusuka kungidanise kakhulu yikuthi abantu laba bazibiza ngokuthi ngabakaNkulunkulu manje kungani sebehlaba abantu ngamanalithi. Angithi lokhu kuchaza ukuthi bayabe bezama ukubabulala ngamanalithi la. Kambe nxa sokunjalo kuyabe kusaseyikukhuleka bani osokuqeda abantu khona abakhulekayo kufanele basize abantu.
Kambe ngubani ohlala elokitshini lePumula ongazange wezwa ukuthi izakhamizi zakule indawo zakhipha amalembu esabekayo emadamu kanye lezihlahleni okwadala ukuthi zicabange ukuthi kungabe kuyiwo avala izulu lapha koMthwakazi esigodlweni. Angithi nje nxa amalembu abo esebahlupha kungcono ukuthi bewagebhele phansi kulokuthi bewatshise. Kambe nxa inkonzo zonke lezi ezikhona koMthwakazi zingaqala ukubophela amalembu azo eziwafunayo ezihlahleni angithi ngeke kuhambeke nje lapha koMthwakazi.
Sizwe saMantungwa, babengasomi oNdukuzibomvu amajaha omkhonto nxa babethi inja kayaze yakhonkotha iphethe ithambo njalo imbilaphi ibakhona ngoba isola isilonda. Kuliqiniso sibili lokhu lami ngikhuluma ngale indaba yamaPositoli nje ngoba balutshwane abasayithakazelela ngenxa yezigigaba esezisenziwa ngamaPositoli.
Ngeqiniso kufanele bazikhuze bahlolisise indlela asebehamba ngazo.
Yebo kambe abadala bathi zonelwa mvunye okuyikuthi laba abenza into le kayisiwo wonke amaPositoli kodwa kuqakathekile ukuthi labo abangakwenziyo lokhu bakhuze labo abakwenzayo njengoba bethi inkomo isengwa ngoyaziyo. Lokhu kungadala ukuthi abenzi bobubi lobu bakume ngoba bekhuzwa ngabantu ababazi kuhle.
Ngezinye indlela ngichaza ukuthi inkokheli zala mabandla kazikhuthaze amabandla azo ukuthi angaze enza ububi lobu ngoba bangcolisa amagama abo. Ekungcoliseni lapha kusuka kungcole ngitsho lamagama abantu abangelamacala ngitsho okusuka kufane lempungutshe eyesulela igqumutsha.
BakaMthwakazi njengoba nje sengivezile ubuhlungu osobuhlasele uMthwakazi ngilethemba lokuthi olendlebe uzwile njalo uzazama ubungcono bakhe kulokhu. Ngitsho nje ngoba akukuhle ukuthi ikhansili iphethe sivala inkonzo lezi ezikhonzela egangeni. Lokhu-ke ukuze kungaze kwenzakala kuqakathekile ukuthi abantu bahloniphe umhlaba.
