uMthunywa
Cornelius Luphahla
INHLANGANISO ekhuthaza ngezokuthula lempilakahle yabantu bonke jikelele iHeal The World ikhuthaza uzulu ukuthi aqakathekise ukuthula kuleli ngenhloso yokuthuthukisa ilizwe.
Inhlanganiso le ifike kuleli ngoMabasa ivela kwele India ngenhloso yokufundisa ngezokuthula kuleli kanye lokuhlalisana kuhle kwabantu emulini.
Isikhulumi sale inhlanganiso kuleli uNkosazana Rashmi Patel uthe bafundisa izifundo ezehlukeneyo mahala ngenhloso yokwandisa ukuthula ebantwini.
“Thina njengenhlanganiso ekhuthaza ngokuthula sifundisa intsha kanye labadala izifundo ezehlukeneyo ukuze kwande ukuthula. Izifundo lezi zigoqela i-Positive Thinking, Raja Yoga Meditation, Stress Free Living kanye le Anger Management.
“Konke lokhu sikufundisa mahala ngoba senzela ukuthi bonke abantu benelise ukufunda. Okwenza sifundise izifundo lezi yikuthi ukungezwani kuqalisa emcabangweni ngakho singafundisa ngokukwenqabela kuzakuba lokuthula,” kutsho uNkszn Patel.
UNkosikazi Rekha Vithal uthe bazakuba lomkhosi wokuvulwa kwenhlanganiso le ngokusemthethweni ngempelaviki.
“NgoMgqibelo sinxusa uzulu ukuthi abekhona emkhosini wokuvulwa kwale inhlanganiso ngokusemthethweni.
Umkhosi lo uzakuba khona eBulawayo Theatre kusukisela ngo 2.30 kusiyafika u 3.00,” kuphetha uNkkz Vithal.
