uMthunywa
Nkosilathi Sibanda
BAKHULUMA bengesabi lutho abeqembu leFilabusi United ngokuthi balande ukuzonqoba babezintshantshu zeligi ka-division one kulisizini.
Iqembu leli lizadlala kuligi esenkabazwe yelizwe njalo liyachinsa ukutshibilika kulesi isibanga somdlalo. Kukhanya isifiso saleliqembu sikhuthazwa yilokho okwenziwa yiTsholotsho ize ibeliqembu lakuqala elivela emaphandleni ukuba yingqwele.
UMgcinisihlalo walo uNqobizitha Dube ubikele iphephandaba likazulu ukuba akaboni lutho olungabaphazamisa ukuthi bangene kuligi ephakemeyo eyePSL ngomnyaka ozayo.
“Siza kuligi le silande ukuzonqoba sibezintshantshu. Okwamanje sesibuthanise iqula labadlali abatshisayo, abazimisele ukuthi bancintise ku-Division One.”
Ubike ukuba iqembu lasungulwa ngomnyaka ka-2012 kujongwe ukuphakamisa ithalenta likanobhutshuzwa kwabasakhulayo kulindawo. Kubikwa iqembu leTalen Vision lisekela ngokugcweleyo iqembu leFilabusi United. Umgcinisihlalo lo usebenza gadalala ukuze iqembu liyephambili encediswa nguMongameli uKelvin Ngwenya oseUnited Kingdom, Lameck Ndlovu lo Stanley Dube.
Ngokunjalo uSam Ndlovu ngumqeqetshi weqembu encediswa nguWonder Mpofu.
UDube uthe akula abadlali abalodumo eqenjini labo njalo inengi ngelikade likhona ngesizini edluleyo beqeda bekunombolo yesibili kuligi yeZifa Division Two Pool A esabelweni seMatabeleland South.
“Silethemba kubadlali esilabo. Iqembu ligcwele abadlali esasilabo ngomnyaka odluleyo. Ngabafana abasakhulayo laba.”
