uMthunywa
YiNtatheli kaMthunywa
LIHLEHLISIWE icala lomtshayeli wetekisi oleminyaka engu-27 ubudala obhekane lecala lokuzitika ngocansi lomzawakhe oleminyaka engu-15 ubudala eBeitbridge.
Kubikwa uNobert Chauke utshele umthethwandaba ukuthi ubengazi ukuthi umzawakhe uleminyaka engaphansi kwevumelekileyo ukwenza ucansi kukanti “upakitshile futhi ubukeka njengowesifazane okhulileyo.”
UChauke, otshadileyo futhi olonkosikazi okhulelweyo, uvumile ukuthi wazitika ngocansi lomzawakhe kodwa walandula ukuthi bebethandana.
UMantshi womthethwandaba weGwanda uJoseph Mabeza ulidlulisele phambili icala leli kumhlaka 8 kuNkwenkwezi.
Phambilini uChauke wayethweswe icala lokudlwengula kodwa ngemva kobufakazi bemiyalezo yeWhatsApp lapho okwavela khona ukuthi laba bebelobudlelwano futhi bevumelene ngokwenza ucansi.
Kusenjalo, owesifazane oleminyaka engu-24 ubudala obebulawa yindlala yocansi eMasvingo uzovela enkantolo ngecala lokudlwengula abantwana besihlobo sakhe abathathu.
Abantwana laba baleminyaka ephakathi kwe-13 le-16 ubudala. Kusolwa ukuthi abantwana laba abangabafana abathathu bayizelamani ezifunda eGuni Secondary njalo sebethole izifo ezithelelwana emacansini kukanti futhi ubufakazi besibhedlela buzokwethulwa emthethwandaba.
UMercy Hlupo (24), waseBhainda Village usolwa ngokulala labantwana laba abathathu abevele elalanabo ekamelweni lakhe ngaphambi kokuba abadlwengule, ebatshintshanisa.
Kuthiwa lumkhuba uqale ukuwenza kusukela ngoMfumfu nyakenye.
Umsolwa kulindelwe ukuthi avele emthethwandaba kamantshi weMasvingo mhlaka 11 kuNkwenkwezi ngecala lokudlwengula.
